შალვა აბულაძე ადვოკატს უნდობლობას უცხადებს

ახალციხის რაიონულ სასამართლოში პროცესი 15:00 საათზე იყო ჩანიშნული, თუმცა ბრალდებულის ადვოკატის, შალვა ხაჭაპურიძის არ გამოცხადების გამო პროცესი გადაიდო. ხაჭაპურიძეს დღეს, დასკვნითი სიტყვა უნდა წაეკითხა, რის შემდეგაც მოსამართლე გადაწყვეტილების მისაღებად გავიდოდა.

ახალციხის რაიონული სასამართლოს მოსამართლე გოჩა ჯეირანაშვილმა განმარტა, რომ სასამართლომ შალვა აბულაძისგან განცხადება მიიღო, რომლის მიხედვითაც აბულაძე აცხადებს, რომ მისი ადვოკატი, შალვა ხაჭაპურიძე იმ პარტიას წარმოადგენს, რომელიც მას ასამართლებს. ამის გამოც ბრალდებული საკუთარ ადვოკატს უნდობლობას უცხადებს.

მოსამართლე გოჩა ჯეირანაშვილის თქმით, ეს ყველაფერი სასამართლოს გაჭიანურებისკენ არის მიმართული და მისი გადაწყვეტილებით, ბრალდებულ შალვა აბულაძეს, სახელმწიფო ადვოკატი დაენიშნება.

ბრალდებულის ადვოკატი, შალვა ხაჭაპურიძე, კი ახალციხის რაიონულ სასამართლოში არგამოცხადების მიზეზს სხვაგვარად ხსნის: "ჩემი დაცვის ქვეშ მყოფის სურვილით პროცესებს აღარ დავესწრები. საბოლოო სიტყვას დაწერილს გამოვაგზავნი".

დღევანდელ სასამართლო პროცესზე შინაგან საქმეთა სამინისტროს სამცხე–ჯავახეთის პოლიციის დეპარტამენტის 30 პოლიციის თანამშრომელი ესწრებოდა: "რატომ ვესწრებით ასე მასშტაბურად? ეს ჩვენი უფლებაა და ვესწრებით", – აცხადებდნენ პოლიციის თანმშრომლები.


შეგახსენებთ, რომ შალვა აბულაძეს ორი პოლიციელის მკვლელობა, ორის დაჭრა და ასევე, ცეცხლსასროლი იარაღის მართლსაწინააღმდეგოდ შეძენა, შენახვა და ტარება ედება ბრალად. იგი სამართალდამცველებმა 2015 წლის 10 აპრილს დააკავეს.

[ვარლამ წიკლაური, ახალციხე]