შალვა აბულაძე: 12–საათიანი შიმშილი არ მაძლევს საშუალებას სასამართლო პროცესს დავესწრო

ახალციხის რაიონულ სასამართლოში პოლიციელების მკვლელობაში ბრალდებულის შალვა აბულაძის საქმეზე მორიგი სასამართლო პროცესი დღეს, 1 ოქტომბერს, 15:00 საათზე იყო ჩანიშნული და 10 წუთის დაგვიანებით დაიწყო. პროცესის დაწყება ბრალდებულის ადვოკატის დაგვიანების გამო გაჭიანურდა. სასამართლო სხდომას არ ესწრება თავად ბრალდებული შალვა აბულაძე.

რატომ არ ესწრება ბრალდებული სასამართლო პროცესს, ამის შესახებ სხდომაზე ბრალდებულის ადვოკატმა ისაუბრა. მას თან აქვს შალვა აბულაძის წერილი, სხდომაზე არ დასწრების მიზეზებზე. წერილის მიხედვით, შალვა აბულაძე აცხადებს, რომ პროცესზე წამოსვლისას, 12 საათის განმავლობაში მას აშიმშილებენ, არც გზაში აჭმევენ და არც სასამართლოში, ამიტომ ჯანმრთელობის პრობლემები ექმნება.

"12–საათიანი შიმშილი და ტანჯვა არ მაძლევს საშუალებას სასამართლო პროცესს დავესწრო. მოძლიერება მჭირდება", – ნათქვამია წერილში.

შალვა აბულაძის ადვოკატმა შალვა ხაჭაპურიძემ მოსამართლეს პროცესის გადადების შუამდგომლობით მიმართა, იმ მოტივით რომ პროცესზე დასწრება სურს ბრალდებულს, თუმცა, მოსამართლემ მისი შუამდგომლობა არ დააკმაყოფილა. სასამართლო ბრალდებულის გარეშე გაიმართება.
დღევანდელ სხდომაზე ბრალდების მხარის 10 მოწმე უნდა დაკითხონ.

შეგახსენებთ, რომ შალვა აბულაძეს ორი პოლიციელის მკვლელობა, ორის დაჭრა და ასევე, ცეცხლსასროლი იარაღის მართლსაწინააღმდეგოდ შეძენა, შენახვა და ტარება ედება ბრალად. იგი სამართალდამცველებმა 2015 წლის 10 აპრილს დააკავეს.

[sknews.ge]