ახალციხის სასამართლო შალვა აბულაძის საქმეს განიხილავს, პროცესს ბრალდებულიც დაესწრება

დღეს, 8 სექტემბერს ახალციხის რაიონულ სასამართლოში შალვა აბულაძის საქმის არსებითი განხილვა 16:00 საათზე დაიწყება.

ბრალდებულის ადვოკატის შალვა ხაჭაპურიძის განცხადებით, პროცესს ბრალდებულიც დაესწრება: „მას ისევ სხვისი დახეულ–დაფხრეწილი ტანსაცმელი აცვია. სახალხო დამცველის რეაგირებისა და ჩარევის შემდეგ მხოლოდ საცვალი მისცეს. ისევ გრძელი წვერი და ფრჩხილები აქვს“.

შეგახსენებთ, რომ აქამდე გამართულ სასამართლო სხდომებს შალვა აბულაძე არ დასწრებია. მიზეზად ადვოკატები მის მიმართ განხორციელებულ არაადამიანურ მოპყრობას ასახელებდნენ და ამბობდნენ, რომ ბრალდებულს პროცესზე დასასწრებად სამოსი არ ჰქონდა. მათივე თქმით, ბრალდებულს არც თავის მოწესრიგების საშუალება ეძლევა.

შეგახსენებთ, რომ შალვა აბულაძეს ბრალად ედება: პოლიციელის სიცოცხლის მოსპობა პოლიციელის სამსახურებრივ საქმიანობასთან დაკავშირებით (2 ეპიზოდი), პოლიციელის სიცოცხლის მოსპობის მცდელობა პოლიციელის სამსახურებრივ საქმიანობასთან დაკავშირებით (2 ეპიზოდი) ასევე, ცეცხლსასროლი იარაღის მართლსაწინააღმდეგოდ შეძენა, შენახვა და ტარება და ცეცხლსასროლი იარაღის მართლსაწინააღმდეგოდ შეძენა, შენახვა.

2015 წლის 11 აპრილს, თბილისის საქალაქო სასამართლომ განიხილა და დააკმაყოფილა ქ.თბილისის პროკურატურის შუამდგომლობა, ახალციხის რაიონული სასამართლოს 2015 წლის 2 თებერვლის განჩინებით ბრალდებულ შალვა აბულაძის მიმართ აღკვეთის ღონისძიების სახედ შეფარდებული პატიმრობის ძალაში დატოვების თაობაზე.

[თამუნა უჩიძე, ახალციხე]