შალვა აბულაძის პროცესს 30 პოლიციელი ესწრება

ახალციხის რაიონულ სასამართლოში პოლიციელების მკვლელობაში ბრლადებული შალვა აბულაძის სასამართლო სხდომა დაიწყო, თუმცა იმის გამო, რომ არც ბრალდებული და არც ადვოკატი პროცესზე არ მივიდა, ცოტახნით შესვენება გამოცხადდა. როგორც მოსამართლემ განაცხადა, ადვოკტთან ტელეფონით დაკავშირება ვერ ხერხდება.

სხდომას 30 პოლიციის თანამშრომელი ესწრება. როგორც შინაგან საქმეთა სამინისტროში აცხადებენ "განსაკუთრებული არაფერი ხდება და ეს ჩვეულებრივი სამუშაო პროცესია".

შინაგან საქმეთა სამინისტროს თანამშრომლები აბულაძის სხდომებს თითქმის ყოველთვის ესწრებიან, თუმცა ექვს–რვა პოლიციელზე მეტი პროცესზე არ ყოფილა.

დღეს სასამართლო სხდომა სავარაუდოდ გადაიდება. რადგან როგორც "სამხრეთის კარიბჭესთან" შალვა აბულაძის ადვოკატმა შალვა ხაჭაპურიძემ სატელეფონო საუბარში განაცხადა, იგი ამის შემდეგ სხდომებზე დაწრებას აღარ აპირებს: "დღეს ახალციხეში აღარ ჩამოვალ. ჩემი დაცვის ქვეშ მყოფის სურვილით პროცესებს აღარ დავესწრები. საბოლოო სიტყვას დაწერილს გამოვაგზავნი".

როგორც ხაჭაპურიძე ამბობს, მომავალი სხდომა 18 დეკემბრისთვის გადაიდება.

შეგახსენებთ, რომ შალვა აბულაძეს ორი პოლიციელის მკვლელობა, ორის დაჭრა და ასევე, ცეცხლსასროლი იარაღის მართლსაწინააღმდეგოდ შეძენა, შენახვა და ტარება ედება ბრალად. იგი სამართალდამცველებმა 2015 წლის 10 აპრილს დააკავეს.

[ვარლამ წიკლაური, თამუნა უჩიძე, ახალციხე]