"სამართლიანი არჩევნების” შემაჯამებელი შეხვედრა

”სამართლიანი არჩევნებისა და დემოკრატიის საერთაშორისო საზოგადოების” ახალციხის კოორდინატორი დიანა მერაბიშვილი ამბობს, რომ საინიციატივო ჯგუფების დახმარებით, რომლებიც ადგილობრივი აქტიური ახალგაზრდებისგან შედგებოდა, ქალაქის რამდენიმე მნიშვნელოვანი პრობლემა მოგვარდა. მათ შორის: დაენიშნა ნაგავმზიდი ახალციხეში, მიქუტიშვილის ქუჩას და გაკეთდა გარეგანათება კოსტავას ქუჩაზე;

მისივე განმარტებით, საინიციატივო ჯგუფების მიერ საკრებულოსთვის წარდგენილ რეკომენდაციებს შორის იყო სასმელი წყლის ხარისხის გაკონტროლება, მაწანწალა ძაღლების პრობლემის მოგვარება და შიდა ქუჩების განათება. რაც შეეხება სასმელი წყლის ხარისხს, თვითმმართველობაში შეტანილი წერილი შპს ”აღმოსავლეთის წყლებს” გადაეგზავნა. მაწანწალა ძაღლების პრობლემის მოგვარებაზე კი დაიწყო მუშაობა კომპეტენტურ არასამთავრობოებთან.

საინიციატივო ჯგუფები, რომებიც აღნიშნულ პრობლემებს იკვლევდნენ და შემდეგ თვითმმართველობას რეკომენდაციებით მიმართავდნენ, პროექტ ”სამოქალაქო საზოგადოების ჩართულობა ადგილობრივი გადაწყვეტილებების მიღების პროცესში” ფარგლებში შეიქმნა. პროექტს ორგანიზაცია ”სამართლიანი არჩევნებისა და დემოკრატიის საერთაშორისო საზოგადოება” ევრაზიის თანამშრომლობის ფონდისა (EPF) და შვედეთის საერთაშორისო განვითარების სააგენტოს SIDA) ფინანსური მხარდაჭერით ახორციელებს. პროექტის მიზანია ლოკალური პრობლემების მოგვარების პროცესში ადგილობრივი თვითმმართველო ორგანოების გამჭვრვალობისა და პასუხისმგებლობის გაძლიერება და ასევე, ადგილობრივი სათემო ორგანიზაციებისა და მედიის უნარ-ჩვევების გაზრდა თვითმმართველო ირგანოების მონიტორინგის კუთხით.

მსგავს პროექტს ”სამართლიანი არჩევნები” საქართველოს ექვს მუნიციპალიტეტში ახორციელებდა. დასკვნით კონფერენციას ორგანიზაცია ნოემბრის ბოლოს, თბილისში გამართავს.

[ნინო ნარიმანიშვილი, ახალციხე]