ახალციხის მერია მაწანწალა ძაღლებისთვის თავშესაფრის მოწყობას გეგმავს

მაწანწალა ძაღლების პრობლემის მოგვარებას ახალციხის მერია სხვა მუნიციპალიტეტებთან გაერთიანებით გეგმავს. ქალაქის მერი გიორგი კოპაძე აცხადებს, რომ შესაძლოა რამდენიმე მუნიციპალიტეტთან ერთად ძაღლების თავშესაფარი გაკეთდეს.

შეკთხვაზე, რა თანხის გაღება შეუძლია ამისთვის ქალაქის მერიას, კოპაძე გვპასუხობს: „200 000 ლარის გაღებას შევძლებთ. ეს თანხა მობილიზებულია, როგორც კი საკითხის გადაწყვეტა დადგება დღის წესრიგში, ჩვენ დავაფინანსებთ“.

მისი თქმით, აქამდე მაწანწალა ძაღლებს კლავდნენ, ამ მეთოდებით პრობლემის მოგვარება დაუშვებელია: „ჩვენ რომ თვითმმართველობაში მოვედით, ეს საკითხი მაშინაც აქტუალური იყო“.

მაწანწალა ძაღლების შესახებ ქალაქის მერმა „დემოკრატ მესხთა კავშირის“ ბაზაზე არსებული ახალციხის ახალგაზრდული ცნეტრის PI TA–ს წარმომადგენლებთან შეხვედრაზე ისაუბრა. ამის შესახებ შეკითხვა დარბაზში ანი მურადაშვილმა დასვა.

შეგახსენებთ, მერს ახალგაზრდები 5 თებერვალს შეხვდნენ; მათ მაწანწალა ძაღლების საკთხის გარდა არა ერთ თემაზე იმსჯელეს.

[თამუნა უჩიძე, ახალციხე]