პარტიების ახალგაზრდა აქტივისტები საარჩევნო საკითხებს გაეცნენ

ახალციხეში მოქმედი პოლიტიკური პარტიებიდან დღეს, 15 სექტემბერს, შეხვედრაზე მხოლოდ "ქართული ოცნებისა“ და პარტია "პაატა ბურჭულაძე – სახელმწიფო ხალხისთვის“ აქტივისტები იმყოფებოდნენ.

საარჩევნო კანონმდებლობაში შეტანილი ცვლილებების შესახებ, ახალგაზრდებს არასამთავრობო ორგანიზაცია "სამართლიანი არჩევნებისა და დემოკრატიის საერთაშორისო საზოგადოების“ წარმომადგენელი ნინო ბიბილეიშვილი ესაუბრა. ბიბილეიშვილი ახალგაზრდებს მაჟორიტარული ოლქების დაყოფის დადებით და უარყოფით მხარეებზე, პარტიებისთვის დაწესებული ბარიერებისა და მედიის როლის შესახებ ესაუბრა.

„ვისაუბრეთ ბარიერთან დაკავშირებულ საკითხებზე, მასში იგულისხმება 50+1 მაჟორიტარის შემთხვევაში და პროპორციული საარჩევნო სიით 5%–ით გაზრდილი ბარიერი. ასევე სამხედრო უბნების გაუქმებასთან დაკავშირებით, იყო საუბარი პარტიების საარჩევნო დროის გადანაწილებაზეც, რომ მათ ჰქონდეთ თანაბარი რაოდენობა“, – განმარტავს „სამართლიანი არჩევნებისა და დემოკრატიის საერთაშორისო საზოგადოების შიდა ქართლისა და სამცხე–ჯაავხეთის რეგიონული კოორდინატორი ნინო ბიბილეიშვილი.

მედიის თემამ ახალგაზრდებში დისკუსია გამოიწვია. "ქართული ოცნების“ აქტივისტების აზრით, საინფორმაციო საშუალებები ყველა მოვლენას ნეგატიურად აშუქებენ და მათი ზეგავლენა მოსახლეობაზე უარყოფითია, პარტია "სახელმწიფო ხალხისთვის“ აქტივისტები კი მიიჩნევდნენ, რომ ბოლო პერიოდში მედიის მიმართ სანდოობა გაიზარდა.

„2012 წლიდან "ქართულ ოცნებაში“ ვიყავი, ჯერ ახალგაზრდულ ფრთაში, ახლა, აგიტატორი ვარ. დღეს ჩვენთვის ძირითადად სიახლე იყო კანონმდებლობაში შეტანილი ცვლილებები, იმიტომ, რომ კარგად არ ვართ ჩახედული კანონმდებლობაში. ბევრ რაღაცაში ვეთანხმებოდი, ბევრ რაღაცაში არა. დისკუსიაც გვქონდა და ჩვენს აზრს ვაფიქსირებდით“, – ამბობს „ქართული ოცნების“ აგიტატორი დავით ხაჭაპურიძე.
შეხვედრის მიზანს, საარჩევნო კანონმდებლობებში შეტანილ ცვლილებებთან დაკავშირებით, პოლიტიკური პარტიების ახალგაზრდა წევრების ინფორმირებულობის დონის გაზრდა წარმოადგენდა.

",ასეთ საკითხებზე ჩვენ ტრენინგები აქამდეც გვქონდა. ამიტომ ჩემთვის სიახლე იყო ამ ადამინებთან შეხვედრა, რომლებიც ჩვენთან ერთად იმყოფებოდნენ და თავიანთი აზრი გამოთქვეს“, – ამბობს ახალი პოლიტიკური ცენტრი "გირჩის“ მენეჯერი. ალექსანდრე ბერიძე.

შეხვედრაზე "ქართული ოცნების“ ახალგაზრდული გუნდის 8 წევრი, ხოლო პარტიიდან "სახელმწიფო ხალხისთვის“ 6 წევრი იმყოფებოდა.

[თაკო ფეიქრიშვილი, ახალციხე]