თვითმმართველობის განვითარების ხელშეწყობისთვის ჟურნალისტებმა ქსელი შექმნეს

სამუშაო შეხვედრა, რომელზეც ეს ქსელი შეიქმნა, 24–26 მაისს, კახეთში, თელავში შედგა. ორი დღის განმავლობაში ჟურნალისტები თვითმმართველობის კოდექსის სიახლეებს, თვითმმართველობისა და დეცენტრალიზაციის არსს, ასევე, ადგილობრივი თვითმმართველობის პროგრამული ბიუჯეტსა და თვითმმართველობაში მოქალაქეთა ჩართულობის დამატებითი ფორმების შესახებ კანონპროექტს გაეცვნენ. მესამე დღეს კი ქსელის ჩამოყალიბებაზე იმსჯელეს.

„ჟურნალისტთა ქსელი ადგილობრივი თვითმმართველობის განვითარების ხელშეწყობისთვის“, – ასე ქვია ქსელს, რომელიც სამუშაო შეხვედრაზე მყოფმა ჟურნალისტებმა ჩამოაყალიბეს. ქსელში გაწევრიანება ნებისმიერ მსურველს შეუძლია, ვისაც სურვილი აქვს, გაცილებით ხშირად მოამზადოს მასალები თვითმმართველობის საკითხებზე.

„ჟურნალისტთა ქსელი ადგილობრივი თვითმმართველობის განვითარების ხელშეწყობისთვის“ წარმოადგენს რეგიონალური განვითარების თემატიკაზე მომუშავე ჟურნალისტების ნებაყოფლობით გაერთიანებას, რომლის მიზანია ადგილობრივი დემოკრატიის განვითარებისა და დეცენტრალიზაციის, მუნიციპალიტეტებში მიმდინარე პროცესების გამჭვირვალობის ხელშეწყობა, ქსელში გაერთიანებულ ჟურნალისტთა მხარდაჭერა და მათ შორის კომუნიკაციის პროცესის უზრუნველყოფა, არასამთავრობო სექტორთან და ადგილობრივი თვითმმართველობის სისტემის მოქმედ სხვა აქტორებთან თანამშრომლობა“, – ნათქვამია ქსელის წესდებაში.

ქსელი არასამთავრობო ორგანიზაცია „სამოქალაქო კულტურის საერთაშორისო ცენტრის“ პროექტის ფარგლებში დაფუძნდა. პროექტი – „საქართველოში დეცენტრალიზაციის რეფორმის ხელშეწყობა“ ფონდი „ღია საზოგადოება საქართველოს“ ფინანსური მხარდაჭერით ხორციელდება.

ჟურნალისტთა ქსელში გაერთიანება ნებისმიერ დაინტერესებულ ჟურნალისტს შეუძლია.

[ნინო ნარიმანიშვილი, ახალციხე]

მასალა მომზადებულია “სამოქალაქო კულტურის საერთაშორისო ცენტრის” პროექტის - „სამოქალაქო საზოგადოება დეცენტრალიზაციისათვის” ფარგლებში , ფონდ „ღია საზოგადოება საქართველოს“ მხარდაჭერით. სტატიაში გამოთქმული მოსაზრებები შესაძლოა არ ემთხვეოდეს სამოქალაქო კულტურის საერთაშორისო ცენტრის და ფონდ „ღია საზოგადოება საქართველოს“ პოზიციას.

„ჟურნალისტთა ქსელი თვითმმართველობის განვითარების ხელშეწყობისთვის"