ახალციხეში საკანონმდებლო ცვლილებებზე იმსჯელეს

სამართლიანი არჩევნებისა და დემოკრატიის საერთაშორისო საზოგადოების”, ”საქართველოს ახალგაზრდა იურისტთა ორგანიზაციის” და ”საერთაშორისო გამჭირვალობა საქართველოს” წარმოადგენლებმა ადგილობრივი მუნიციპალიტეტის გამგეობის თანამშრომლებსა და არასამთავრობო ორგანიზაციების წარმომადგენლებს საარჩევნო კანონმდებლობაში შესატანი რეკომენდაციები გააცნეს.

”ამ პროექტებზე დიდი ხანია ვმუშაობთ. ძველმა ხელისუფლებამ ჩვენი რეკომენდაციები ნაწილობრივ გაითვალისწინა, თუმცა დარჩა გარკვეული საკითხები, რაც გასათვალისწინებელია. როცა საქართველოს პარლამენტში ინტერფრაქციული ჯგუფი შეიქმნა, ჩვენ შესაძლებლობა მოგვეცა ისევ წამოგვეჭრა ეს საკითხები”, - ამბობს ”სამართლიანი არჩევნების და დემოკრატიიული საზოგადოების” პროექტის კოორდინატორი ელენე ნიჟარაძე.

საარჩევნო გარემოს გასაუმჯობესებლად აღნიშნულმა ორგანიზაციებმა რეკომენდაციები ინტერფრაქციულ ჯგუფს უკვე გადაუგზავნეს. რეკომენდაციები ძირითადად ამომრჩეველთა სიებს, ადმინისტრაციული რესურსის გამოყენებას, პარტიების დაფინანსებას და მედიის მიერ წინასაარჩევნო კამპანიის გაშუქებას ეხება.

”იმისათვის, რომ საზოგადოებასაც გავაცნოთ ჩვენი რეკომენდაციები და მათი მოსაზრებები გავიგოთ, რეგიონებში მრგვალ მაგიდებს ვაწყობთ. მათ მოსაზრებებს ინტერფრაქციული ჯგუფსაც გადავუგზავნით”, - ამბობს ნიჟარაძე.

მსგავსი შეხვედრა გასულ კვირას გორში ჩატარდა, ხვალ ბორჯომში გაიმართება. მთელი კვირის განმავლობაში მსგავსი შეხვედრები რუსთავში, მარნეულში, დუშეთში, გურჯაანში და თელავში იგეგმება.

[მანანა სარაშვილი, ახალციხე]