შალვა აბულაძის საქმის განხილვა დასრულდა

ახალციხის რაიონულ სასამართლოში ორი პოლიციელის მკვლელობაში ბრალდებულის საქმეზე დაცვის მხარემ დასკვნითი სიტყვა წაიკითხა.

ახალციხის რაიონულ სასამართლოში პროცესი დაცვის მხარის საბოლოო სიტყვებით უნდა გაგრძელებულიყო, თუმცა, მოსამართლე გოჩა ჯეირანაშვილმა გლდანის მე–7 დაწესებულებიდან შალვა აბულაძის გამოგზავნილი განცხადება წაიკითხა.

„18 უარი“ ასე ჰქვია განცხადებას, რომელიც აბულაძემ ახალციხის რაიონულ სასამართლოში გამოგზავნა. მასში აბულაძე სხდომებზე გამოუცხადებლობის მიზეზებზე , ასევე, საპატიმროში არაადამიანურ მოპყრობაზე საუბრობს.

როგორც ბრალდებული განცხადებაში ხსნის, „18 უარი“ იმიტომ დაწერა, რომ მისი შვილი მარიამი, 18 აგვისტოს არის დაბადებული. იგი ამავე განცხადებაში საკუთარ თავს, „იუდას“ ადარებს და ამბობს, რომ რა ლოგიკითაც ახალციხის რაიონული სასამართლო მის გასამართლებას ცდილოობს ამით „იუდა“ გაასამართლეს.

დღევანდელ პროცესზე განცხადებებთან ერთად, ახალციხის რაიონულ სასამართლოს შალვა აბულაძემ წიგნი „ბავშვების აღზრდა განვითარება“ გამოუგზავნა.

შალვა აბულაძის განცხადებების შემდეგ, მისმა ადვოკატმა, საბოლოო სიტყვა წაიკითხა, რის შემდეგაც ახალციხის რაიონული სასამართლოს მოსამართლე, გოჩა ჯეირანაშვილის გადაწყვეტილების გამოსატანად გავიდა.

ახალციხის რაიონული სასამართლო შალვა აბულაძის განაჩენს, 21 დეკემბერს, 13:00 საათზე გამოაცხადებს.

შეგახსენებთ, რომ შალვა აბულაძეს ორი პოლიციელის მკვლელობა, ორის დაჭრა და ასევე, ცეცხლსასროლი იარაღის მართლსაწინააღმდეგოდ შეძენა, შენახვა და ტარება ედება ბრალად. იგი სამართალდამცველებმა 2015 წლის 10 აპრილს დააკავეს.

[ვარლამ წიკლაური, ახალციხე]