შალვა აბულაძის საქმეზე ორი მოწმე დაიკითხა

ახალციხის რაიონულ სასამართლოში პროცესი 15 :30 საათზე, ბრალდების მხარის მტკიცებულების გამოკვლევით გაგრძელდა. ბრალდების მხარემ სასამართლოს ორი მოწმე წარუდგინა, აქედან ერთ–ერთი მოწმე, ქალაქ თბილისის პროკურატურის საგამოძიებო ნაწილის უფროსი გამომძიებელი, ძვიად იზორია იყო.

იზორიამ იმ საგამოძიებო მოქმედებებზე ისაუბრა, რომელიც 4 აპრილის ღამეს ჩაატარა. კერძოდ ის სტუდენტი დაკითხა, რომელთანაც, როგორც თვითონ ამბობს, თბილისში მომხდარი მკვლელობის შემდეგ შალვა აბულაძე პირველი მასთან მივიდა.

გარდა ამისა, დღევანდელ პროცესზე არდაგანში, შალვა აბულაძის დაკავების დროს ამოღებული იარაღის გამოკვლევაც მოხდა.

აბულაძის ადვოკატმა, შალვა ხაჭაპურიძემ მოსამართლეს შუამდგომლობითაც მიმართა. ადვოკატის განცხადებით აბულაძის მეუღლე, სასამართლოში მოწმის სახით უნდა დაიკითხოს, რადგან მასზე პოლიციელების მხრიდან ზეწოლა განხორციელდა, თუმცა მოსამართლემ შუამდგომლობა არ დაუკმაყოფილა.

შეგახსენებთ, რომ შალვა აბულაძეს ორი პოლიციელის მკვლელობა, ორის დაჭრა და ასევე, ცეცხლსასროლი იარაღის მართლსაწინააღმდეგოდ შეძენა, შენახვა და ტარება ედება ბრალად. იგი სამართალდამცველებმა 2015 წლის 10 აპრილს დააკავეს.

მორიგი სასამართლო პროცესი 17 ნოემბერს, 14:00 საათზე ჩაინიშნა.

[ვარლამ წიკლაური, ახალციხე]