ვალეში გაფიცული მუშები ხვალ კომპანიის მენეჯერს შეხვდებიან

აქცების მესამე დღეს ვალეში მოლაპარაკების მეორე რაუნდიც დასრულდა. შეხვედრიდან უკვე გამოვიდა მოსალაპარაკებლად შესული 9 ადამიანი. მათი თქმით, კომპანიას სურს სამუშაო პროცესი აღდგეს და გარკვეულ დათმობებზე მიდის.

მალევე, გაფიცულებთან დასალაპარაკებლად გამოვიდა მშენებლობის ხელმძღვანელი აკინ ოზგუჩი. მან ტირილით სთხოვა მუშებს საპროტესტო აქციები შეწყვიტონ: „დაბრუნდით სამუშაოებზე, თორემ კომპანია იხურება და მშივრები ვრჩებით. თქვენც ოჯახები გყავთ და მეც, თქვენც სულ მშივრები დარჩებით და ჩვენც“.

აკინ ოზგუჩიმ მუშებს გადასცა, რომ ხვალ კომპანიის მენეჯერს შეხვდებიან.


მშენებლობის ხელმძღვანელი აკინ ოზგუჩი.

ამ დროისთვის აქციის მონაწილეები იშლებიან. გააგრძელებენ თუ არა საპროტესტო აქციებს ხვალ, კომპანიის მენეჯერთან შეხვედრის შემდეგ გადაწყდება. თუმცა, მათ უკვე ახალი მოთხოვნა აქვთ, სამუშაო საათების ღირებულებაზე 1 ლარი დაუმატონ.

შეგახსენებთ, აქციების მესამე დღეს კომპანია „ბეხტელ–ენკა“ გაფიცული მუშების პროტესტს ნაწილობრივ დათანხმდა. მუშებს უთხრეს, რომ სამუშაო სააათები ძველ რეჟიმს დაუბრუნდება, გარდა ამისა, კვირასდასვენების დღედ გამოცხადდება.

შეგახსენებთ, ვალეში, სამხრეთ კავკასიური გაზსადენის პროექტის გაფართოების სამუშაობზე დასაქმებული მუშები მესამე დღეა პროტესტის ნიშნად არ მუშაობენ.


[ვარლამ წიკლაური, ნინო ნარიმანიშვილი, ახალციხე]