ვალეში გაფიცული 19 მუშიდან, რომლებიც სამუშაოდ გარდაბანში დააბრუნეს, ოთხი სამსახურიდან გაათავისუფლეს

ვალეში, სამხრეთ–კავკასიური გაზსადენის გაფართოების პროექტის 19 მუშა, რომლებიც კომპანიამ სამუშაოდ გარდაბნიდან ვალეში გადაიყვანა, ისევ გარდაბანში, ამავე პროექტის ფარგლებში დაასაქმეს, თუმცა როგორც დასაქმებულები ამბობენ 11 დეკემბერს, 19 მუშიდან 4 მათგან ხელშეკრულების დამთავრების მიზეზით სამსახურიდან გაათავისუფლეს.

„სამუშაოზე დაგვაბრუნეს, მაგრამ დღეს, 4 ადამიანი ისევ გაათავისუფლეს, თქვენ კონტრაქტები დაგიმთავრდათო. შავ მუშებად ვმუშაობთ, ცუდად არ გვექცევიან, მეც რამდენიმე დღეში ხელშეკრულება მიმთავრდება, გამიგრძელებენ თუ არა, არ ვიცი“, – ამბობს მერაბი ბუდაღაშვილი.

შეგახსენებთ, რომ ვალეში საპროტესტო აქცია 2 დეკემბერს დაიწყო, ამ დღეს 200–მდე მუშა გაიფიცა. დილის 09:00 საათიდან დაწყებული აქცია 15:00 საათამდე გაგრძელდა. მუშები ითხოვდნენ კომპანიის ხელმძღვანელობასთან დალაპარაკებას, თუმცა უშედეგოდ. ასევე უშედეგოდ ელოდნენ შუამდგომლობას სამცხე–ჯავახეთის სამხარეო ადმიისტრაციიდან.

ამ დღეს კომპანიამ სამსახურიდან 19 თანამშრომელი გაათავისუფლა, იმ მოტივით, რომ ისინი თბილისიდან და გარდაბნიდან იყვნენ გადმოყვანილი. გათავისუფლებულები ღამით სასტუმროდანაც გაყარეს.

აქცია მეორე დღეს, 3 დეკემბერსაც გაგრძელდა. მუშები ისევ ავიდნენ სამშენებლო ობიექტზე, შედარებით ნაკლები, დაახლოებით 100 ადამიანი და იგივე მოთხოვნები წაუყენეს კომპანიას. „ბეხტელ–ენკას“ ადგილობრივმა ხელმძღვანელობამ გაფიცულებს მოლაპარაკება შესთავაზა. მუშებმა სათათბიროდ 4 ადამიანი შეარჩიეს, შეხვედრა ჟურნალისტებისთვის დახურულ კარს მიღმა შედგა. კომპანიამ მუშებს მოთხოვნების დაკმაყოფილებაზე უარი უთხრა.

გაფიცულები ამ დღესაც შუადღეს დაიშალნენ, იგივე პირობით, რომ აქციებს გააგრძელებდნენ.

აქციის მესამე დღეს, 4 დეკემბერს, გაფიცულებს კომპანიის ხელმძღვანელობა შეხვდა და სამუშაო საათების ისევ მომატებას და შესაბამისად, ხელფასების გაზრდას დაპირდა. მუშების ნაწილმა თავიდან შეთავაზებაზე უარი თქვა, რადგან ითხოვდნენ ორმაგად ანაზღაურებოდათ შაბათ დღეს მუშაობა. თუმცა, საბოლოოდ დათანხმდნენ და სამსახურებს დაუბრუნდნენ.

[ვარლამ წიკლაური, ახალციხე]