ახალციხეში „თავისუფალმა დემოკრატებმა“ ფრაქცია დატოვეს

ამის შესახებ, ყოფილმა წევრებმა ბრიფინგი დღეს, 13 ნოემბერს, გამართეს.

„ქვეყანაში შექმნილმა პოლიტიკურმა ვითარებამ გადაგვაწყვეტინა დაგვეტოვებინა ფრაქცია“ქართული ოცნება–თავისუფალი დემოკრატები. ფრაქციასთან ერთად ვტოვებთ პარტიას. ჩვენ ვრჩებით კოალიციაში.შეიქმნება ახალი პარტია, რომლის წესდებასაც, მომავალში მოგაწვდით“, – განაცხადა ახალციხის საკრებულოს წევრმა, ფრაქცია „ქართული ოცნება–თავისუფალი დემოკრატების“ უკვე ყოფილმა წევრმა გელა ნოზაძემ, რომელიც ამავე დროს ახალციხის მუნიციპალიტეტის საკრებულოში იურიდიული კომისიის თავმჯდომარის მოვალეობასაც ასრულებს.

ახალციხის მუნიციპალიტეტის საკრებულოში ფრაქცია „ქართული ოცნება– თავისუფალ დემოკრატებში“ სამი წევრი იყო: გელა ნოზაძე, პაიცარ მინასიანი და ფრაქციის თავმჯდომარე ბიძინა გოგოლაძე.

გამართულ ბრიფინგზე ბიძინა გოგოლაძე არ იმყოფებოდა.

ფრაქციის დატოვების შესახებ განცხადებით, ახალციხის მუნიციპალიტეტის საკრებულოს იურიდიულ კომისიას პაიცარ მინასიანმა გუშინ,12 ნოემბერს მიმართა. ფრაქციის უკვე ყოფილი წევრები აცხადებენ, რომ უმრავლესობაში რჩებიან და უახლოეს მომავალში ახალი ფრაქციის ჩამოყალიბებას გეგმავენ, რომელსაც „ქართული ოცნება–დემოკრატიული ახალციხე“ ერქმევა.

„ოპოზიციაში გადასვლა ნამდვილად არ მინდა იმიტომ, რომ რაც შევპირდით მოსახლეობას და რა გეგმებიც გვაქვს განსახორციელებელი, ამის გაკეთებას ოპოზიციაში გადასვლის შემთხვევაში ვეღარ შევძლებთ. ჩვენ ქვეყნის ინტერესებიდან გამომდინარე მივიღეთ ეს გადაწყვეტილება“, – განაცხადა გელა ნოზაძემ.

[თინათინ ზაზაძე, ახალციხე]