’ოცნების’ ფრაქციას ’ქრისტიან-დემოკრატი’ თავმჯდომარე ჰყავს

ფრაქციის თავმჯდომარის საკითხი ახალციხის მუნიციპალიტეტის საკრებულომ გუშინდელ საკრებულოს სხდომაზე განიხილა. ახალციხის მუნიციპალიტეტის საკრებულოს 2012 წლის 9 ნოემბრის №49 განკარგულებაში შეტანილი ცვლილებების თანახმად ფრაქციას ამიერიდან ნუგზარ თამარაშვილი უხელმძღვანელებს. შეგახსენებთ, რომ ნუგზარ თამარაშვილი ’ქრისტიან-დემოკრატიული გაერთიანების’ სამცხე-ჯავახეთის კოორდინატორია.

თამარაშვილამდე ფრაქციის თავმჯდომარე ოლეგ სანდროშვილი იყო, რომელიც ამჟამად ახალციხის მუნიციპალიტეტის საკრებულოს თავმჯდომარეა. იგი ფრაქციის თავმჯდომარეობიდან საკუთარი განცხადების საფუძველზე გადადგა, მას შემდეგ რაც საკრებულოს თავმჯდომარედ აირჩიეს.

- ’საკრებულოში სულ სამი დეპუტატი ვიყავით ოპოზიციური პარტიიდან, ოლეგ სანდროშვილი, ნანული ქეშიშევა და მე. არჩეენების შემდეგ გადავწყვიტეთ შეგვექმნა გამარჯვებული პარტიის ფრაქცია იმ წევრებისგან, რომლებიც ოპოზიციაში ვიყავით’, - განმარტავს ნუგზარ თამარაშვილი.

მისივე თქმით, რადგან მისი პარტიისა და ’ქართული ოცნების’ ინტერესები ემთხვეოდა, ამიტომ გადაწყვიტეს, ერთობლივად შეექმნათ ახალი, სახელისუფლებო ფრაქცია, რომელიც იქნება ’ნაციონალური მოძრაობის’ ოპოზიცია: ’შემდეგ სხვა წევრებმაც გამოთქვეს სურვილი, რომ ფრაქციაში გაერთიანებულიყვნენ’.

ფრაქციაში ’ქართული ოცნება - ახალციხე’ ამ ეტაპზე 14 წევრია. შეგახსენებთ, რომ ახალციხის მუნიციპალიტეტის საკრებულოში 26 დეპუტატია.

[თამარ თოთაძე, ახალციხე]