ახალციხის საკრებულოს ორი ფრაქცია დაემატა

ფრაქციები, უმრავლესობის ექვს–ექვსი დეპუტატით დაკომპლექტდა.

ფრაქციას „მრეწველობა გადაარჩენს საქართველოს“ გიორგი ბეროშვილი, ხოლო „კონსერვატორებს“ არუთუნ აგაბაგიანი უხელმძღვანელებს.

ახალციხის საკრებულოს თავმჯდომარის გელა ნოზაძის განცხადებით, ფრაქციები საკრებულოს აპარატში უკვე დარეგისტრირდა, მომავალ სხდომაზე კი დეპუტატები მათ განაცხადებს ცნობად მიიღებენ.

შეგახსენებთ, რომ 14 ნოემბერს ახალად არჩეული საკრებულოს დაკომპლექტებისას, წარმომადგენლობით ორგანოს ფრაქციების შექმნის თაობაზე „ევროპულმა საქართველომ“ მიმართა, სადც სამი წევრი გაერთიანდება და გელა დემეტრაძე უხელმძღვანელებს და „ქართული ოცნება–დემოკრატიული საქართველომ“, სადაც უმრავლესობის 16 დეპუტატი გაერთიანდება და გიორგი გვარამაძე უხელმძღვანელებს.

ახალციხის საკრებულოში ფრაქციის გარეშე „ნაციონალური მოძრაობა“ რჩება, სადაც ორი დეპუტატია. ფრაქციის შექმნისთვის კი სამი, ან სამზე მეტია საჭირო.

[ლუბა გიორგაძე, ახალციხე]