ახალციხის მუნიციპალიტეტის საკრებულოში ოთხი ფრაქცია შეიქმნა

ახალციხის მუნიციპალიტეტის საკრებულოში რიგით მეორე სხდომა დღეს, 21 ივლისს გაიმართა. 30 დეპუტატიდან სხდომას 2 დეპუტატი არ ესწრებოდა.

დეპუტატებმა დღეს ფრაქციების შექმნის შესახებ საკრებულოში შესული განცხადებები განიხილეს. ახალციხის მუნიციპალიტეტის საკრებულოში ოთხი ფრაქცია შეიქმნა. „ქართული ოცნება – რესპუბლიკელებს“ იოსებ კაპანაძე უხელმძღვანელებს, ფრაქცია „ქართული ოცნებას“ გიორგი ზაქროშვილი, „ქართული ოცნება – თავისუფალი დემოკრატების“ თავმჯდომარე ბიძინა გოგოლაძე იქნება, ფრაქცია „ერთიან ნაციონალურ მოძრაობას“ კი კვლავ მარინე სუდაძე უხელმძღვანელებს.

საკრებულოს თავმჯდომარის დავით ლომიძის განმარტებით, შესაძლოა ამ რიცხვს კიდევ ერთი ფრაქცია შეემატოს.

„კიდევ იყო ერთი განცხადება ასევე „ერთიანი ნაციონალური მოძრაობის“ ფრაქციის შექმნაზე, პატარა ხარვეზები ჰქონდათ დოკუმენტაციაში, რასაც შეასწორებენ და ალბათ მომდევნო სხდომაზე განვიხილავთ“, – განმარტავს დავით ლომიძე.

დღევანდელ სხდომაზე საკრებულოში შექმნილი ხუთი მუდმივმოქმედი კომისიის თავმჯდომარეები წარადგინეს და კომისიის შემადგენლობები დაამტკიცეს. ასევე დამტკიცდა სამსახურის დებულებები.

„დეპუტატებმა თავად დაასახელეს რომელ კომისიის შემადგენლობაში სურდათ ყოფნა. ერთი დეპუტატი ერთ კომისიაში აუცილებლად უნდა ყოფილიყო და საკუთარი სურვილისამებრ ერთდროულად ორ კომისიაშიც შეეძლო ყოფნა“, – განმატავს ახალციხის მუნიციპალიტეტის საკრებულოს თავმჯდომარე.

დღესვე ცნობილი გახდა, რომ ახალციხის მუნიციპალიტეტის გამგეობაში აუდიტის სამსახური შეიქმნება.

„დეპუტატებმა იკითხეს თუ რატომ იყო საჭირო ამ სამსახურის შექმნა, რაზეც ჩვენმა იურისტებმა გასცეს პასუხი. ყოველ წელს იწვევდნენ აუდიტს, მერე რაღაც შეცდომები იპარებოდა, ახლა ჩვენი აუდიტი გვეყოლება“, – განმარტავს დავით ლომიძე.

ახალციხის მუნიციპალიტეტის საკრებულოს სხდომა ხვალამდე გადაიდო. დავით ლომიძის თქმით, ხვალინდელ სხდომაზე მუნიციპალიტეტის გამგეობისა და საკრებულოს საშტატო ნუსხასა და სახელფასო განაკვეთებს განიხილავენ.

[თამარ თოთაძე, ახალციხე]