შალვა გოგოლაძემ ფრაქცია 'ქართული ოცნება რესპუბლიკელები' დატოვა

ქალაქ ახალციხის მუნიციპალიტეტის საკრებულოს რიგით მეოთხე სხდომაზე, რომელიც დღეს, 13 მარტს გაიმართა, ერთ–ერთი საკითხი ფრაქცია „ქართული ოცნება რესპუბლიკელების“ გაუქმებას ეხებოდა. ფრაქცია ერთ–ერთმა წევრმა შალვა გოგოლაძემ დატოვა.

„ფრაქციის პლატფორმაში დეკლარირებული იყო ლიბერალური ღირებულებები, რომლის გარშემოც შეიქმნა ფრაქცია, სიტყვის თავისუფლება, თავისუფლებები და უფლებები, პლულარიზმი. ამ ღირებულებების გარშემო შევიკრიბები ნებისმიერ გუნდთან. მაგრამ ამ ფრაქციის მოქმედებაში მე ვეღარ დავინახე, რომ ამ ღირებულებებს წინ აყენებდნენ და ამიტომ დავტოვე ფრაქცია“, – განაცხადა „სამხრეთის კარიბჭესთან“ საუბარში შალვა გოგოლაძემ.

მან საკრებულოს განცხადებით 18 თებერვალს მიმართა. საკრებულოს დღევანდელ სხდომაზე დეპუტატებს ახალი ფრაქციის შექმნის შესახებ აცნობეს.

„თუ ფრაქციაში სამ წევრზე ნაკლებია, უკვე დაშლილად ითვლება, მაგრამ შეიქმნა ფრაქცია „ერთობა“, რომელიც არაპოლიტიკურია“, – ამბობს საკრებულოს თავმჯდომარე კახაბერ ბერიძე.

ფრაქცია „ერთობას“ ორი წევრი უკვე ყოფილი ფრაქცია „ქართული ოცნება რესპუბლიკელების“ წევრები ნინო ანანიაშვილი და თამარ გოგოლაძე არიან. მესამე წევრი კი საკრებულოს დეპუტატი გელა პეტაშვილია.

[თამარ თოთაძე, ახალციხე]