’’საკრებულოს თავმჯდომარის შეცვლას არ ვაპირებთ”

ამ დროისათვის ფრაქცია ”ქართული ოცნება- რესპუბლიკელები” ექვსი წევრით განისაზღვრება. ფრაქციის თავმჯდომარე თამაზ ხოზრევანიძე ამბობს, რომ ფრაქციაში გაწევრიანების სურვილით, საკრებულოს სხდომაზე, ფრაქციის დარეგისტრირების შემდეგ, სამმა დეპუტატმა მიმართა. ჯამში ფრაქციაში ექვსი დეპუტატია გაწევრიანებული.

როგორც ფრაქციის თავმჯდომარე ამბობს, უმრავლესობის მიღწევის შემთხვევაში საკადრო ცვლილებებს არ გეგმავენ: ”23 დეპუტატიც რომ გაწევრიანდეს ფრაქციაში, საკრებულოს თავმჯდომარის შეცვლას არ ვაპირებთ”.

ადიგენის მუნიციპალიტეტის საკრებულოს თავმჯდომარე გივი ენდელაძეა. იგი ამ პოსტზე 2010 წლის 18 ივნისს აირჩიეს.

შეგახსენებთ, რომ უმრავლესობის მიღწევის შემთხვევაში ფრაქციის წევრებს უფლება აქვთ მოითხოვონ საკრებულოს თავმჯდომარის გადაყენება. სწორედ ამ გზით გადაირჩიეს საკრებულოს თავმჯდომარე ახალციხეში.

ადიგენის მუნიციპალიტეტის საკრებულოს სამანდატო კომისიას ფრაქციამ ”ქართული ოცნება- რესპუბლიკელები” განცხადებით 21 ნოემბერს მიმართა. ფრაქცია ოფიციალურად 3 დეკემბერს დარეგისტრირდა.

ადიგენის მუნიციპალიტეტის საკრებულოში 24 დეპუტატია.

[თინათინ ზაზაძე, ადიგენი]