ადვოკატი: შალვა აბულაძის საკანში ვირთხები და ტარაკნები დარბიან

დღეს, 30 ოქტომბერს, ახალციხის რაიონულ სასამართლოში პოლიციელების მკვლელობაში ბრალდებულის, შალვა აბულაძის მორიგ სასამართლო პროცესზე ექსპერტები დაკითხეს. ბრალდებულის ადვოკატმა კი ციხის ის ოთახი აღწერა, რომლშიც აბულაძე ჰყავთ.

ახალციხის რაიონულ სასამართლოში პროცესი ადვოკატის განცხადებით დაიწყო. ბრალდებულის ადვოკატმა, შალვა ხაჭაპურიძემ თბილისის მე–7 დაწესებულების ის ოთახი აღწერა, სადაც აბულაძე იმყოფება. ადვოკატმა მოსამართლეს შუამდგომლობით მიმართა, ციხის ადმინისტაციას აბულაძის ოთახის პირობების გაუმჯობესება სთხოვოს.

ადვოკატის განცხადებით, საკანში, რომელშიც შალვა აბულაძე იმყოფება, ანტისანიტარიაა: „ვირთხები და ტარაკნები დარბიან ოთახში. არ არის ‘ვენტილაცია’, და ფანჯარა. იატაკის მაგივრად 90–იანი წლების დროს დასხმული ბეტონია. კედლები დათხრილი, საკანში სინათლე სულ ანთია და არასდროს ქრება. შალვა ჰაერზე რამდენიმე წუთით გაჰყავთ, თუმცა იშვიათად. არ უცვლიან ზეწრებს, მას აცვია ციხის ადმინისტრაციისგან მიცემული ტანისამოსი, რომელიც ამ დროის განმავლობაში არ გამოუცვლია. საპირფარეშო ოთახში აქვს, საიდანაც ვირთხები ამოდიან.

საპირფარეშოსთან ახლო მაგიდა დგას და როდესაც შალვა საჭმელს ჭამს, საჭმელს საპირფარეშოს წყალი ესხმება“, – განაცხადა ადვოკატმა.

მისივე თქმით, ამ ეტაპზე ბრალდებულს ჯანმრთელობასთან დაკავშირებით პრობლემები აქვს, კერძოდ, ფილტვების დაავადება და ცე ჰეპატიტი: „ციხის ადმინისტრაცია არ გვაძლევს იმის საშუალებას, რომ საკანში ექიმი შევიყვანოთ. ჯანმრთელობის მდგომარეობა უუარესდება. ამ საკითხთან დაკავშირებით, სტრასბურგს რამდენიმე დღეში მივმართავთ“.

ახალციხის რაიონული სასამართლოს მოსამართლე გოჩა ჯეირანაშვილი ადვოკატის დაპირდა, რომ პროკურატურას და ციხის ადმინისტაციას აუცილებლად დაეკონტაქტება.

ბრალდებულის ადვოკატის განცხადების შემდეგ, ბრალდების მხარემ სასამართლოს 2 ექსპერტი წარუდგინა, რომლებმაც, თბილისში, ჯავახიშვილის ქუჩაზე მომხდარი მკვლელობიდან ტყვიის მასრები ამოიღეს და გარდაცვლილი პოლიციელის, ასევე დაჭრილის ტანსაცმელს ექსპერტიზა ჩაუტარეს.

პროცესის დასრულების შემდეგ, ბრალდებულმა შალვა აბულაძემ დარბაზში მსხდომ ნათესავებს და მეგობრებს მიმართა და სთხოვა, რომ სახალხო დამცველის წარმომადგენელს შეახვედრონ: „ჩემს მეუღლეს და ჩემს შვილს მიეცით ჩემი გვარი. საბავშვო ბაღებში მიდით, ქველმოქმედება გაიღეთ და ბავშვებს კანფეტები გადაეცით. რაც ადვოკატმა ჩემ საკანზე განაცხადა, არ შეგეშინდეთ, პირიქით, მე სულიერად ვძლიერდები და ვმაღლდები. ერთმანეთს ემსახურეთ, ამპარტავნება დაივიწყეთ. ჩემი იმედი გქონდეთ, მე ამაში დაგარწმუნებთ“.

შეგახსენებთ, რომ შალვა აბულაძეს ორი პოლიციელის მკვლელობა, ორის დაჭრა და ასევე, ცეცხლსასროლი იარაღის მართლსაწინააღმდეგოდ შეძენა, შენახვა და ტარება ედება ბრალად. იგი სამართალდამცველებმა 2015 წლის 10 აპრილს დააკავეს.

ახალციხის რაიონულ სასამართლოში შალვა აბულაძის მორიგი სასამართლო სხდომა 3 ნოემბერს, 15:00 საათზე ჩაინიშნა.

[ვარლამ წიკლაური, ახალციხე]