შალვა აბულაძის მშობლებმა მოწმის სტატუსით დაკითხვაზე უარი განაცხადეს

ახალციხის რაიონულ სასამართლოში პროცესი 20 წუთის დაგვიანებით, ბრალდებულის ადვოკატის გამო დაიწყო. პროცესის დაწყებისთანავე ბრალდებულმა განცხადების უფლება ითხოვა.

აბულაძის განცხადება ისევ კვების საკითხს უკავშირდებოდა. ბრალდებულმა განაცხადა, რომ როდესაც იგი თბილისიდან ახალციხეში სასამართლო პროცესზე მოჰყავთ, საკვებს არ აძლევენ, რის გამოც ჯანმრთელობასთან დაკავშირებით პრობლემები ექმნება. მოსამართლე გოჩა ჯეირანაშვილმა ბრალდებულს განუმარტა, რომ ამ საკითხთან დაკავშირებით ციხის ადმინისტრაცია საქმის კურსშია.

დღევანდელ პროცესზე ბრალდების მხარემ დაკითხვა თბილისში მომხდარი მკვლელობის საქმიდან დაიწყო. პროკურორმა პოლიციის ის თანამშრომელი დაკითხა, რომელსაც ვარკეთილის მეტროსთან, მანქანით, სამსახურეობრივი მოვალეობის შესრულების დროს სროლის ხმა შემოესმა.

„მანქანიდან რომ გადმოვედი, ვიღაც გარბოდა, ინსტიქტურად მეც გავეკიდე. არ ვიცოდი ვინ იყო, ისეთი სისწრაფით გარბოდა, ვერ დავეწიე, ვერც იარაღის სროლა მოვახერხე, მე ხომ არ ვიცოდი ვინ იყო“, – განაცხადა დავით თათრიშვილმა.

მისივე თქმით, ცოტახანში ხალხმრავლობაც შენიშნა და იქით წავიდა, სწორედ ამ დროს გაიგო, რომ ვიღაცამ ორი პოლიციელი დაჭრა.

თბილისში მომხდარი მკვლელობის ეპიზოდიდან ის სტუდენტიც დაიკითხა, რომელმაც, როგორც თვითონ ამბობს, ბრალდებული შალვა აბულაძე სახლში შეიფარა. რატი გელბახიანმა ის დღე დეტალურად გაიხსენა.

გელბახიანმა საკითხვისას განაცხადა, რომ მთელი დღის განმავლობაში ბრალდებული მის სახლში იყო, ესაუბრებოდა სხვადასხვა თემებზე და სამახსოვროდ წიგნიც აჩუქა: „მე არ ვიცოდი ეს ადამიანი ვინ იყო, სანამ სახლში გვიან არ დავბრუნდი და ჩემი სახლის სადარბაზოსთან და ეზოში პოლიციის ბევრი ეკიპაჟი არ დამხვდა“.

თბილისის ეპიზოდის შემდეგ, პროკურორს მოწმეები ბორჯომიდან ჰყავდა მოწვეული. მათ შორის იყო გარდაცვილი პოლიციელის, გიორგი ბერუაშვილის უფლებამონაცვლე, ნატალია ხუციშვილი. მან ის დღე გაიხსენა, როდესაც მეუღლის დაჭრის შესახებ ინფორმაცია გაიგო.

ბრალდებისა და დაცვის მხარის შეკითხვების ამოწურვის შემდეგ, გარდაცვლილის მეუღლეს კითხვა ბრალდებულმა, შალვა აბულაძემ დაუსვა: „თქვენ იმის განცდა ხომ არ გქონიათ, რომ როდესაც პოლიციამ ბინები და დიდი თანხა გადმოგცათ, ამით პოლიცია საკუთარი შეცდომებას გადაფარვას ცდილობს?“

ნატალია ხუციშვილმა აბულაძის შეკითხვას არ უპასუხა და სასამართლოსგან მისი უმკაცრესი დასჯა მოითხოვა.

დღევანდელ პროცესზე მოწმის სახით ბრალდებულის, შალვა აბულაძის მშრობლებიც ჰყავდათ დაბარებული, თუმცა სასამართლო პროცესზე ორივე მათგანმა მოწმის სახით დაკითხვაზე უარი განაცხადა.

შეგახსენებთ, რომ შალვა აბულაძეს ორი პოლიციელის მკვლელობა, ორის დაჭრა და ასევე, ცეცხლსასროლი იარაღის მართლსაწინააღმდეგოდ შეძენა, შენახვა და ტარება ედება ბრალად. იგი სამართალდამცველებმა 2015 წლის 10 აპრილს დააკავეს.

შალვა აბულაძის შემდეგი სასამართლო სხდომა 21 ოქტომბერს, 14:00 საათზეა ჩანიშნული.

[ვარლამ წიკლაური, ახალციხე]