დღეს, 1 ოქტომბერს, ახალციხის რაიონულ სასამართლოში, პოლიციელების მკვლელობაში ბრალდებულის შალვა აბულაძის სასამართლო პროცესზე გარდაცვლილი ბექა მარგიშვილის დედა, შემთხვევის დროს თბილისში დაჭრილი პოლიციელი და ექსპერტები დაკითხეს.
16:00 საათზე დანიშნული პროცესი ბრალდებულის ადვოკატის შეყოვნების გამო 10 წუთის დაგვიანებით დაიწყო. პროცესს
ბრალდებული არ დასწრებია. სხდომის დაწყებისთანავე დაცვის მხარემ მოსამართლეს პროცესის გადადების შუამდგომლობით მიმართა, იმ მიზეზით, რომ ბრალდებულ შალვა აბულაძეს პროცესზე დასწრება არ შეეძლო. ადვოკატს თან ჰქონდა ბრალდებულის წერილი, პროცესზე ვერ დასწრების მიზეზებზე.
„დღემდე უკანონოა და დაუსაბუთებელი 6–თვიანი წამება. ვინაიდან სასამართლო დაშორებულია საპატიმრო დაწესებულებას, თბილისიდან ახალციხემდე და მანდ, პროცესზე დასწრებას 12 საათი სჭირდება, მე ამ დროის განმავლობაში მშიერი ვარ. ეს შიმშილი ჩემზე ძალიან მოქმედებს, ბოლო პროცესზე რომ ვიყავი, ციხისგან მოვითხოვე კვება, თუმცა უარი მივიღე. 12–საათიანი შიმშილი არ მაძლევს საშუალებას, რომ პროცესს დავესწრო. თუ არ მომცემენ საჭმელს, იგივე განმეორდება შემდეგ პროცესზეც“, – ნათქვამი იყო შალვა აბულაძის წერილში, რომელიც ადვოკატმა პროცესზე წაიკითხა.
მოსამართლე გოჩა ჯეირანაშვილმა ადვოკატის შუამდგომლობა არ დააკმაყოფილა: „პროცესი არ უნდა გაჭიანურდეს, ამიტომ პროცესი ბრალდებულის გარეშე გაგრძელდება“.
დღევანდელ სხდომაზე დაცვის მხარის მოწმეები დაკითხეს. 2015 წლის 4 აპრილს, თბილისში, ვარკეთილში მომხდარი თავდასხმისას გარდაცვლილი პოლიციელის ბექა მარგიშვილის დედა, ამავე შემთხვევისას დაჭრილი პოლიციელი ვალერიან გრძელიშვილი და ექსპერტები.
სასამართლოს პირველი ჩვენება გარდაცვლილი პოლიციელის ბექა მარგიშვილის დედამ მისცა. ირმა ზარდიაშვილმა ის დღე გაიხსენა, როდესაც შვილის სიკვდილი, საზღვარგარეთ, სოციალური ქსელით გაიგო: „ჩემ შვილს აღარც თმა ეზრდება, არც ფრჩხილები და აღარც შია. მიესაჯოს ის, რაც ეკუთვნის. არ მინდა ჩემსავით კიდევ ვინმე გაამწაროს“.
ბექა მარგიშვილის მკვლელობის დღეს დაჭრილმა პოლიციელმა დეტალურად გაიხსენა 4 აპრილის ღამე.
„დაახლოებით 9 საათი იქნებოდა, ჯავახეთის ქუჩის მიმართულებით, მეტროსთან დავინახე ერთი პიროვნება, რომელსაც ხაკისფერი შარვალი ეცვა, მუქი ფერის ქურთუკი და ზურგჩანთა. თითქოს არ ესიამოვნა პოლიციელების დანახვა, ჩვენსკენ უცნაურად გამოიხედა. საეჭვოდ მომეჩვენა და დავუძახე გაჩერებულიყო. მან ნაბიჯს აუჩქარა, მეც უკან მივდევდი. გამომძახა: მეჩქარება, ცუდად ვარო. ჩქარი ნაბიჯით გავყევი უკან, უცბად მოტრიალდა, როგორც ჩანს იარაღი დატენილი ჰქონდა და მესროლა მუცლის არეში. მე ვეღარ ვესროლე, ძირს დავვარდი, თუმცა სროლის ხმა კიდევ მესმოდა. ცოტახანში ბექას ყვირილი გავიგე, დაჭრილი ვარო, ეს იყო და ეს, მეტი არაფერი მახსოვს“, – განაცხადა ვალერიან გრძელიშვილმა და აღნიშნა, რომ პიროვნება, რომელმაც მათ ცეცხლი გაუხსნა, შალვა აბულაძეა.
ექსპერტები კი იმ დეტალებზე საუბრობდნენ, რა დეტალებიც ადასტურებს, რომ მკვლელობის ადგილებიდან ამოღებული მასრების კვალი შალვა აბულაძემდე მიდის.
პროცესზე ბალისტიკური და ქიმიური ექსპერტზის დასკვნებიც წარადგინეს. დასკვნების მიხედვით, ბორჯომსა და თბილისში მომხდარი სროლების შემთხვევის ადგილიდან ამოღებული მასრები გასროლილია იმ ცეცხლსასროლი იარაღიდან, რომელიც ბრალდებულ შალვა აბულაძეს დაკავების დროს ჰქონდა.
სასამართლოს დასრულების შემდეგ, შალვა ხაჭაპურიძემ ჟურნალისტებთან საუბარში განაცხადა, რომ აღნიშნული დასკვნები დაუშვებლად მიაჩნია.
„ექსპერტების დასკვნა დაცვის მხარეს არ გადმოსცემია. ამიტომ ეს მტკიცებულებები დაუშვებელია და ვფიქრობ, რომ ამ საკითხს მოსამართლე გაიზიარებს“, – განაცხადა შალვა ხაჭაპურიძემ.
შეგახსენებთ, რომ შალვა აბულაძეს ორი პოლიციელის მკვლელობა, ორის დაჭრა და ასევე, ცეცხლსასროლი იარაღის მართლსაწინააღმდეგოდ შეძენა, შენახვა და ტარება ედება ბრალად. იგი სამართალდამცველებმა 2015 წლის 10 აპრილს დააკავეს.
შალვა აბულაძის საქმეზე მომდევნო სასამართლო პროცესი 6 ოქტომბერს,14:00 საათზე დაინიშნა.
[ვარლამ წიკლაური, ახალციხე]