‘ახალციხეში 37 წლის წინანდელი სასამართლოა’– ახალქალაქში მომხდარი მკვლელობის საქმე

ახალციხის რაიონულ სასამართლოში პროცესი 12:00 საათზე იყო ჩანიშნული, თუმცა 15 წუთის დაგვიანებით დაიწყო. პროცესის დაწყებისთანავე ბრალდებულების ადვოკატმა მაიზერ ბაბლუანმა მოსამართლეს შუამდგომლობით მიმართა. მან მოსამართლეს სთხოვა ამოიღონ საზღვრის დაცვის დეპორტამენტის მიერ ნინოწმინდაში გადაღებული ვიდეომასალა, რომელშიც ა.იგიტიანის დაკავების დროა დაფიქსირებული.

„ვინაიდან ამ ვიდეომასალის მოპოვების უფლება დაცვის მხარეს ეკრძალება, გთხოვთ, მიიღოთ შესაბამისი ზომები და ეს ვიდეო მასალები მტკიცებულებაში იქნას გამოყენებული“, – განაცხადა ადვოკატმა.

მისი თქმით, ვიდეო მასალების ამოღების მოთხოვნით მან მიმართა გენერალურ ინსპექციასა და საზღვრის დაცვის დეპარტამენტს, თუმცა უარი მიიღო. ამ ვიდეო მასალაში კი ნათლად სჩანს ა. იგიტიანის დაკავების დრო.

ადვოკატის განცხადებით, მას იმ ვიდეო მასალის მოპოვების სურვილიც ჰქონდა, რომელიც ნინოწმინდის პოლიციის შესასვლელში დამონტაჟებული კამერიდანაა გადაღებული. მისი ვარაუდით, იმ მასალაში გამოჩნდება ბრალდებულების პოლიციაში მიყვანის ზუსტი დრო: „ნინოწმინდის პოლიციის შენობაზე 4 სათვალთვალო კამერა იყო დამონტაჟებული, როდესაც მე, გენერალურ ინსპექციას ვიდეო მასალა ვთხოვე წერილობით, დაახლოებით 5 დღეში სათვალთვალო კამრები ნინოწმინდის პოლიციის შენობიდან მოხსნეს“.

ადვოკატმა მოსამართლეს ამ ვიდეომასალების გამოთხოვაც სთხოვა: „ეს შუამდგომლობა დავაყენე წინა პროცესზე, თუმცა უშედეგოდ. მინდა, რომ ეს მასალები მოხვდეს სასამართლო განხილვის მტკიცებულებებში“.

ახალციხის რაიონული სასამართლოს მოსამართლემ მარიკა ჩიტაშვილმა ადვოკატის შუამდგომლობა არ დააკმაყოფილა იმ მიზეზით, რომ მას არ აქვს, ამ ვიდეო მასალების გამოყენების საფუძვლიანი დასკვნა.

დღევანდელ პროცესზე, პროკურორს და ადვოკატს შესავალი სიტყვები უნდა წაეკითხათ, თუმცა პროკურორმა მამუკა ქომოშვილმა შესავალი სიტყვის წასაკითხათ რამდენიმე დღიანი შუამდგომლობით მიმართა მოსამართლეს. მოსამართლემ ქომოშვილს შუამდგომლობა დაუკამაყოფილა და სასამართლო პროცესი გადადო.

„დაცვის მხარეს თუ არ აქვს საშუალება დაიცვას მისი დაცვისქვეშ მყოფები, მაშინ ეს 37 წლის წინანდელი სასამართლოა“, – განაცხადა პროცესის დასრულების შემდეგ ბრალდებულის ადვოკატმა მაიზერ ბაბლუანმა.

შეგახსენებთ, რომ 26 ივლისს ახალქალაქის მუნიციპალიტეტის სოფელ ორჯასთან სარქის აკოფიანი მოკლეს. მომხდარზე ძიება სსკ–ის 108–ე მუხლით მიმდინარეობს. მოგვიანებით, სამართალდამცველებმა სამი პირი დააკავეს. საქმის მასალების მიხედვით, სამივე მათგანი მკვლელობაში ბრალდებულებს დანაშაულის ჩადენაში ეხმარებოდა.

ამ საქმეზე მორიგი სასამართლო სხდომა 12 ოქტომბერს,12:00 საათზეა ჩანიშნული.

[ვარლამ წიკლაური, ახალციხე]