ბრალდებული სასამართლო პროცესზე: ჩემი დაკითხვის ოქმზე სხვისი ხელმოწერაა

ახალციხის რაიონულ სასამართლოში, ახალქალაქში მოკლული კრიმინალური ავტორიტეტის სარქის აკოფიანის საქმესთან დაკავშირებით დაკავებული სამი ახალგაზრდის პროცესი, დღეს, 17 მარტს, ერთ–ერთი ბრალდებულის, ა. კარაპეტიანის დაკითხვით გაგრძელდა.

პროკურორმა მამუკა ქომოშვილმა ბრალდებულს რამდენიმე შეკითხვა დაუსვა, მათ შორის ერთ–ერთი კარაპეტიანის დაკითხვის ოქმს ეხებოდა. პროკურორმა კარაპეტიანს ჰკითხა, ნამდვილად მისია თუ არა ხელმოწერა დაკითხვის ოქმზე.

ბრალდებულმა კარაპეტიანმა პროკურორს განუცხადა, რომ დაკითხვის ოქმზე მისი ხელმოწერა არ არის და მეტიც, ის ხელმოწერა, რომელიც ბრალდებულის საქმეში ინახება, გაყალბებულია: „ეს ხელმოწერა ჩემი არ არის. ჩემს ხელმოწერას მიამსგავსეს ალბათ“.

პროცესის დასრულების შემდეგ ბრალდებულის ადვოკატმა მაიზერ ბაბლუანმა განაცხადა, რომ ამ პროცესის შემდეგ, წესით, მოსამართლემ ბრალდებულ კარაპეტიანის დაკითხვის ოქმი ბათილად უნდა სცნოს.

ამ პროცესით ახალქალაქში მოკლული კრიმინალური ავტორიტეტის სარქის აკოფიანის საქმის არსებითი განხილვა დასრულდა. შემდეგი სასამართლო პროცესი, რომელიც 5 აპრილს, 12:00 საათზეა ჩანიშნული, ბრალდების, ასევე დაცვის მხარის დასკვნით სიტყვებს დაეთმობა, რის შემდეგაც მოსამართლე მარიკა ჩიტაშვილი გადაწყვეტილებას გამოაცხადებს.

შეგახსენებთ, რომ კრიმინალური ავტორიტეტი სარქის აკოფიანი, ახალქალაქის მუნიციპალიტეტის სოფელ ორჯასთან, 26 ივნისს, დღისით ჩაცხრილეს. რამდენიმე დღის შემდეგ, სამართალდამცველებმა სოფელ განძაში, კარაპეტიანი, იგიტიანი და ნალბანდიანი დააკავეს. სამივე მათგანს სსკ–ის 376–ე მუხლით ედება ბრალი, რაც დანაშაულის შეუტყობინებლობას გულისხმობს.

ნალბანდიანს კი გარდა 376–ე მუხლისა, ბრალს 353–ე მუხლით, პოლიციის თანამშრომელზე თავდასხმისთვისაც სდებენ.

[ვარლამ წიკლაური, ახალციხე]