ახალციხის რაიონული სასამართლო ნინოწმინდელების საქმეს, რომლებსაც ბრალს მკვლელობაში ბრალდებულების დახმარებისთვის სდებენ, დაახლოებით ოთხი საათის განავლობაში იხილავდა.
წინასასამართლო სხდომაზე სასამართლოში განსახილველი მტკიცებულებების ნუსხა ჯერ პროკურორმა მამუკა ქომოშვილმა წარადგინა. ბრალდებულების იგიტიანის, ნალბანდიანისა და კარაპეტიანის ადვოკატმა მაიზერ ბაბლუანმა კი განაცხადა, რომ ქომოშვილის მიერ წარდგენილი მტკიცებულებების ნაწილი სასამართლოს დაუშვებლად უნდა ეცნო. დაუშვებელ მტკიცებულებათა ნუსხაში დაცვის მხარემ სხვა მტკიცებულებებთან ერთად რიგი მოწმეებისა და ასევე ბრალდებულების დაკითხვის ოქმები ჩამოთვალა.
მისი განცხადებით, ბრალდებულები კანონის დარღვევით დააკავეს, ჩვენებები კი ცემითა და წამებით მიიღეს: „იგიტიანს დაემუქრნენ, რომ მის ფეხმძიმე მეუღლეს გააუპატიურებდნენ. ნალბანდიანს კი სამხარეო სამმართველოში ცემისა და ბათქა–ბუთქის შემდეგ აგინეს, – „შენი სომეხი დედაო“. ამიტომ მათ მიერ ხელმოწერილი დოკუმენტები არ შეიძლება, რომ მტკიცებულებად ჩაითვალოს. ბრალდებულები იმ პოლიცილებს, რომლებიც მათ ფიზიკურად გაუსწორდნენ, ამოიცნობენ“.
ნალბანდიანი რომ ნაცემია, ეს ბაბლუანის განცხადებით, სასამართლო–სამედიცინო ექსპერტიზითაც დადასტურდა, თუმცა, აღნიშნული მტკიცებულება სასამართლოში განსახილველ მტკიცებულებათ ნუსხაში არ მოხვედრილა. პროკურორმა ეს საჭიროდ არ ჩათვალა, ადვოკატმა კი როგორც განმარტა, რადგან ეს მათ მიერ მოპოვებული მტკიცებულება იყო, მიიჩნია, რომ სადავო აღარაფერია და პროკურატურამ ამით ნალბანდიანის ცემის ფაქტი, ფაქტობრივად აღიარა.
ბრალ
დების მხარის მტკიცებულებების ნუსხის შემდეგ, სასამართლოში განსახილველი მტკიცებულებები დაცვის მხარემ წარადგინა. თუმცა, მას შემდეგ რაც ბაბლუანმა ნუსხა ჩაიკითხა, პროკურორმა განაცხადა, რომ აღნიშნული მტკივებულებები მას წინა სასამართლო სხდომამდე 5 დღით ადრე გადაეცა, თუმცა, კანონდარღვევით. ქომოშვილი ბაბლუანს 4 საათში მოედავა: მისი განმარტებით ბაბლუანს პროკურატურისთვის მტკიცებულებები 16 სექტებერს, 12 საათამდე უნდა გაეცვალა, თუმცა მან დოკუმენტები პროკურატურაში 16:00 საათზე მიიტანა.
მოსამართლემ პროკურორის მიერ წარდგენილი მტკიცებულებების ნუსხა სრულად დაამტკიცა, ბაბლუანის მტკიცებულებები კი დაუშვებლად ცნო.
ამის შემდეგ სასამართლომ ბრალდებულების აღკვეთის ღონისძიების შეცვლაზე იმსჯელა. დაცვის მხარის განცხადებით, საქმეზე ყველა მტკიცებულება უკვე მოპოვებულია და მათ განადგურებას საფრთხე აღარ ემუქრება. გარდა ამისა, იგიტიანს, კარაპეტიანსა და ნალბანდიანს ბრალი ნაკლებად მძიმე დანაშაულის ჩადენაში ედებათ.
„თუ აქედან გასვლის შემდეგ ესენი სადმე წავლენ, ეს საქართველოში სომხეთის საელჩო იქნება, რომ
სომხეთს პოლიტიკური თავშესაფარი სთხოვონ. ამიტომ გთხოვთ, პატიმრობის სანაცვლოდ გამოიყენოთ გირაო 5000 – 5000 ლარის ოდენობით“, – განაცხდა პროცესზე ბაბლუანმა.
მას არ დაეთანხმა ბრალდების მხარე. ქომოშვილის განცხადებით, მართალია, აკოფიანის მკვლელობის საქმეზე ძიება ცალკე მიმდინარეობს, მაგრამ შესაძლოა მკვლელობაში ბრალდებულებთან მათ კავშირი ჰქონდეთ და მიიმალონ.
მოსამართლემ ადგილზე თათბირით დაცვის მხარის შუამდგომლობა არ დააკმაყოფილა. ასევე, არ დააკმაყოფილა ბაბლუანის შუამდგომლობა იმის შესახებ, რომ საქმეზე არსებითი განხილვა არ გაგრძელებულიყო და ბრალდებულების სისხლის სამართლებრივი დევნა შეწყვეტილიყო.
„ვინც დაიკითხებიან, ისინი ცრუ მოწმეები არიან, მათ დღეს აგულიანებენ, რომ ჩვენება არ გადათქვან, თორემ დაიჭერენ. ჩემი დაცვის ქვეშ მყოფები სასამართლოში დაასახლებენ იმ პირებს, რომლებიც მათ წამებას ახორციელებდნენ, ჩვენ დანაშაულს არ დავიბრალებთ, რომელიც არ ჩაგვიდენია“, – განაცხადა ბაბლუანმა პროცესის დასრულების შემდეგ და დაამტა, რომ მოსამართლეზე ზეწოლა ხორციელდება.
პროკურორმა მამუკა ქომოშვილმა სასამართლო უკომენტაროდ დატოვა. შინაგან საქმეთა სამინისტროდან ზეწოლის ფაქტების შესახებ კთხვებზე პასუხს კი „სამხრეთის კარიბჭე“ ამ დრომდე ელოდება.
შეგახსენებთ, რომ 26 ივლისს ახალქალაქის მუნიციპალიტეტის სოფელ ორჯასთან სარქის აკოფიანი მოკლეს. მომხდარზე ძიება სსკ–ის 108–ე მუხლით მიმდინარეობს. მოგვიანებით, სამართალდამცველებმა სამი პირი დააკავეს. საქმის მასალების მიხედვით, სამივე მათგანი მკვლელობაში ბრალდებულებს დანაშაულის ჩადენაში ეხმარებოდა.
[თამუნა უჩიძე, ახალციხე]