‘ჩემი ცემის დროს, მანდ არ იყავი, როცა იარაღს პირში მიშვერდი?' – ბრალდებული პოლიციელს სასამართლო დარბაზში

ახალციხის რაიონულ სასამართლოში 12:00 საათზე ჩანიშნული სხდომა, ნახევარი საათით გვიან, ბრალდებულების ადვოკატის დაგვიანების გამო დაიწყო. დღევანდელ სხდომაზე, ბრალდების მხარეს სამი მოწმე, წალკის რაიონის ინსპექტორ–გამომძიებელი, წალკის რაიონული სამმართველოს გამომძიებელი, ასევე შსს–ს სამცხე–ჯავახეთის კადრების განყოფილების თანამშრომელი ლევან ზარიძე ჰყავდა წარდგენილი.

წალკის ინსპექტორ–გამომძიებლებმა მამედ აბულაევმა და მარად კეკელიძემ იმ საგამოძიებო მოქმედებებზე ისაუბრეს, რომლებიც შემთხვევის ადგილზე ჩაატარეს. კერძოდ, მათ მანქანის დათვალიერებასა და მკვლელობის ადგილიდან, რამდენიმე დღეში, შემთხვევით აღმოჩენილ სარქის აკოფიანი მანქანის ნომერზე ისაუბრეს.

დღევანდელ სასამართლო სხდომაზე ბრალდების მხარეს, ის გამომძიებელიც ჰყავდა წარდგენილი, რომელიც სარქის აკოფიანი მკვლელობის დროს, სამცხე–ჯავახეთის მთავარ სამმართველოში დეტექტივ–გამომძიებლად მუშაობდა.

მაშინდელმა დეტექტივ– გამომძიებელმა ლევან ზარიძემ, აკოფიანის საქმესთან დაკავშირებით ჩატარებულ საგამოძიებო მოქმედებებზე ისაუბრა. ზარიძის თქმით, მან ბრალდებული იგიტიანი დაკითხა და მეორე ბრალდებულის, კარაპეტიანის დაკვებაში მონაწილეობდა.
ლევან ზარიძის დაკითხვას ბრალდებულის, ა. იგიტიანის გაღიზიანება მოჰყვა. იგიტიანმა გაცხადა, რომ მისი მოსმენა არ სურდა, თუმცა პროკურორმა მამუკა ქომოშვილმა ზარიძის დაკითხვა კვლავ გააგრძელა.

ზარიძემ განაცხადა, რომ იგიტიანი ახალციხის რაიონულ სამმართველოში დაკითხვაზე საკუთარი ნებით მივიდა: „სამმართველოში მოსვლის დროს, მცირე დაზიანებები აღენიშნებოდა. ალბათ მანამდე ჰქონდა ეს დაზიანებები მიღებული. დაკითხვა მშვით ვითარებაში მიმდინარეობდა. დაკითხვის შემდეგ დავაკავეთ და იზოლატორში გადავიყვანეთ“.

ზარიძე მონაწილეობდა კარაპეტიანის დაკავებაშიც. მან განაცხადა, რომ დაკავების დროს კარაპეტიანმა წინააღმდეგობა გაუწია და მცირე დაზიანებები მიიღო.

–„თქვენ ემუქრებოდით თუ არა იგიტიანს გადატენილი იარაღით, ასევე აგინებდით და პარკით გუდავდით?“– ჰკითხა ზარიძეს ბრალდებულის ადვოკატმა, მაიზერ ბაბლუანმა.

– „მსგავსი რამ არ მომხდარა, წყნარ ვითარებაში მიმდდინარეობდა დაკითხვა“, – უპასუხა ზარიძემ.

– "ჩემი ცემის დროს, მანდ არ იყავი, როცა იარაღს პირში მიშვერდი?" – ჰკითხა ზარიძეს ბრალდებულმა იგიტიანმა.

–„ არა, მსგავსი ფაქტი არ ყოფილა“– განცხადა, ლევან ზარიძემ.

ახალციხის რაიონულ სასამართლოში სხდომა 2 საათს გაგრძელდა. პროცესის დასრულების შემდეგ ბრალდებულების ადვოკატმა, მაიზერ ბაბლუანმა განაცხადა, რომ ბრალდებულმა იგიტიანმა ის პოლიციის თანამშრომელი ამოიცნო, რომელმაც იგი აწამა.

„იგიტიანმა ამოიცნო ზარიძე, რომელიც ბრალდებულს იარაღს პირში თხრიდა, აგინებდა და ცელოფნის პარკით მოგუდვას ცდილობდა. დღემდე დაკითხული 10 მოწმიდან ბრალდებულებს ზარიძის გარდა არცერთზე უთქვამთ, რომ რომელიმემ აწამა. ის რაც იგიტინმა თქვა, არის სიმართლე, რადგან მან, ზუსტად ის პირი ამოიცნო, რომელმაც აწამა“, – განაცხადა ბრალდებულების ადვოკატმა მაიზერ ბაბლუანმა.

შეგახსენებთ, რომ კრიმინალური ავტორიტეტი სარქის აკოფიანი, ახალქალაქის მუნიციპალიტეტის სოფელ ორჯასთან, 26 ივნისს, დღისით ჩაცხრილეს. რამდენიმე დღის შემდეგ, სამართალდამცველებმა სოფელ განძაში, კარაპეტიანი, იგიტიანი და ნალბანდიანის დააკავეს. სამივე მათგანს სსკ–ის 376–ე მუხლით ედება ბრალი, რაც დანაშაულის შეუტყობინებლობას გულისხმობს.

ნალბანდიანს კი გარდა 376–ე მუხლისა, ბრალს 353–ე მუხლით, პოლიციის თანამშრომელზე თავდასხმისთვისაც სდებენ.

ახალციხის რაიონულ სასამართლოში შემდეგი პროცესი 2 დეკემბერს,13:00 საათზეა ჩანიშნული.

[ვარლამ წიკლაური, ახალციხე]