ახალქალაქში მკვლელობის საქმეზე ბრალდებულების ადვოკატი დააჯარიმეს

დღეს, 8 დეკემბერს კრიმინალური ავტორიტეტის, სარქის აკოფიანის მკვლელობის შემდეგ დაკავებული ნინოწმინდელების საქმეზე მორიგი სასამართლო სხდომა გაიმართა.

პროცესი ბრალდებულების ადვოკატის მაიზერ ბაბლუანის განმარტებით დაიწყო. წინა სასამართლო სხდომა მისი გამოუცხადებლობის გამო ვერ ჩატარდა. როგორც ბაბლუანმა განაცხადა, იგი ამ დღეს საგამოძიებო ღონისძიებაში იღებდა მონაწილეობას: „საქმეს გრიფით საიდუმლო ადევს, მოგეხსენებათ თბილისში ტერორისტების საქმე იხილება. მოსამართლეს დახურულ ფორმატში შემიძლია ამის შესახებ ავუხსნა, თუმცა იმის გამო რომ პროცესზე ვერ გამოვცხადდი მზად ვარ ჯარიმაც გადავიხადო“.

როგორც მოსამართლე მარიკა ჩიტაშვილმა განაცხადა, მათ ბაბლუანთან ტელეფონით დაკავშირება არა ერთხელ სცადეს, თუმცა მისი მობილური გამორთული იყო: „სასამართლო წინასწარ უნდა გაგეფრთხილებინათ“.

ჩიტაშვილმა ბაბლუანი 100 ლარით დააჯარიმა.

დღევანდელ სხდომაზე სასამართლოს არცერთი მტკიცებულება არ გამოუკვლევია. პროკურორმა სასამართოში გარდაცვლილი სარქის აკოფიანის სამედიცინო ექსპერტიზის დასკვნა წარადგინა, შესაბამისად სასამართლოში ექსპერტი დავით მერაბიშვილი უნდა დაეკითხათ. თუმცა აღნიშნული მტკიცებულება, დაცვის მხარემ უდავო გახადა. პროკურორმა კი სხვა მოწმე სასამართოში ვერ წარმოადგინა.

მომავალი სხდომა 14 დეკემბერს 15:00 საათზე გაიმართება.

შეგახსენებთ, რომ კრიმინალური ავტორიტეტი სარქის აკოფიანი, ახალქალაქის მუნიციპალიტეტის სოფელ ორჯასთან, 26 ივნისს, დღისით ჩაცხრილეს. რამდენიმე დღის შემდეგ, სამართალდამცველებმა სოფელ განძაში, კარაპეტიანი, იგიტიანი და ნალბანდიანი დააკავეს. სამივე მათგანს სსკ–ის 376–ე მუხლით ედება ბრალი, რაც დანაშაულის შეუტყობინებლობას გულისხმობს.

ნალბანდიანს კი გარდა 376–ე მუხლისა, ბრალს 353–ე მუხლით, პოლიციის თანამშრომელზე თავდასხმისთვისაც სდებენ.

[თამუნა უჩიძე, ახალციხე]