ბრალდებულები საქართველოს მოქალაქეობაზე უარს ამბობენ – ახალქალაქში მომხდარი მკვლელობის საქმე

წინასასამართლო სხდომა ახალციხის რაიონულ სასამართლოში 12:00 საათზე დაიწყო. პროცესის დაწყებამდე, ბრალდებულების ახლობლებმა სასამართლოს შენობასთან მშვიდობიანი აქცია გამართეს. ისინი აცხადებდნენ, რომ სამართლიან მართლამსაჯულებას მოითხოვენ. აქციის მონაწილეები სასამართლოს სხომასაც ესწრებიან.

როგორც ადვოკატმა მაიზერ ბაბლუანმა განაცხადა, რომელიც სამივე ბრლდებულს დაიცავს, დღეს სასამართლო პროცესზე ბრალდებულები განაცხადებენ, რომ საქართველოს მოქალაქეობაზე უარს ამბობენ და სომხეთში პოლიტიკურ თავშესაფარს მოითხოვენ.

„ისინი გარეთ რომც გამოვიდნენ, ამ ქვეყანაში თავისუფალი ცხოვრების საშუალებას მაინც არ მისცემენ“, – ამბობს ადვოკატი.

მაიზერ ბაბლუანმა ბრალდებულების პოლიტიკური თავშესაფრის მოთხოვნით 10 აგვისტოს სომხეთის საელჩოს უკვე მიმართა. გარდა ამისა, ბრალდებულები და ადვოკატი სამართალდამცველებს უფლებამოსილების გადამეტებაში, ცემასა და წამებაში ედავებიან. მათი განცხადებით, ერთ–ერთ ბრალდებულს სამცხე–ჯავახეთის სამხარეო მთავარი სამმართველოს თანამშრომლები პოლიციაში დაემუქრნენ, რომ მის თვალწინ მის ფეხმძიმე ცოლს გააუპატიურებდნენ. ფიზიკური ზეწოლის ფაქტები, ადვოკატის განცხადებით, ექსპერტიზითაც დადასტურდა.

მაიზერ ბაბლუანმა პოლიციელების ფიზიკურ ზეწოლასთან დაკავშირებით გენინსპექციას მიმართა და როგორც იგი აცხადებს, თბილისმა საქმე სამცხე–ჯავახეთის პროკურატურას გადმოუგზავნა.

„ვისაც ვადანაშაულებთ, საქმე გამოსაძიებლად იმას გამოუგზავნეს“,– ამბობს ბაბლუანი.

იგი პოლიციის თანამშრომლებს ეთნიკური ნიშნით დისკრიმინაციაშიაც ადანაშაულებს.

როგორც ადვოკატი აცხადებს, ძიება ცემის ფაქტზე 333–ე მუხლით არის დაწყებული, რაც სამსახურეობრივი უფლებამოსილების გადამეტებას გულისხმობს.

შეგახსენებთ, 2015 წლის 26 ივლისს, ახალქალაქის მუნიციპალიტეტის სოფელ ორჯასთან მამაკაცი ცეცხლსასროლი იარაღით მოკლეს. მომხდარზე ძიება სსკ–ის 108–ე მუხლით მიმდინარეობს. მოგვიანებით, სამართალდამცველებმა სამი პირი დააკავეს. საქმის მასალების მიხედვით, სამივე მათგანი მკვლელობაში ბრალდებულებს დანაშაულის ჩადენაში ეხმარებოდნენ.



[თამუნა უჩიძე, თამარ თოთაძე, ახალციხე]