ბექა მარგიშვილის დედა: 'უფალმა შეუნდოს შალვას [აბულაძე] რაც გააკეთა'

დღეს, 1 ოქტომბერს, ახალციხის რაიონულ სასამართლოში, პოლიციელების მკვლელობასა და დაჭრაში ბრალდებულის შალვა აბულაძის საქმეზე, ბრალდების მხარის 10 მოწმე დაკითხეს. მათ შორის, 4 აპრილს, თბილისში, ვარკეთილში მომხდარი შემთხვევისას გარდაცვლილი ბექა მარგიშვილის დედა, ირმა ზანდარაშვილი. პროკურატურას იგი დაზარალებულის უფლებამონაცვლედ ჰყავდა დაბარებული.

ირმა ზანდარაშვილი დაახლოებით 15 წუთის განმავლობაში იკითხებოდა. ამ პერიოდის განმავლობაში მან ბექას ბავშვობა და ის დღე გაიხსენა, როდესაც შვილის გარდაცვალების შესახებ გაიგო.

მისი ჩვენების მიხედვით, მაშინ იგი იტალიაში, ქალაქ ნეაპოლში ცხოვრობდა. 4 აპრილს ბექას ჯერ დღის პირველ ნახევარში ესაუბრა, მაშინ ბექა ისვენებდა. გვიან ღამით სოციალური ქსელის საშუალებით ისევ შეეხმიანა, მოიკითხა და დამდეგი ბზობის დღე მიულოცა. მეორე დღეს, 5 აპრილს, „ფეისბუქში“ ბექას შეტყობინება არ დახვდა, რამაც გააოცა: „ვისვენებდი და გარეთ ვაპირებდი წასვლას, თან „ფეისბუქს“ თვალყურს ვადევნებდი, ბექას არაფერი ჰქონდა მოწერილი, გამიკვირდა, უპასუხოდ არასდროს მტოვებდა. უეცრად ინტერნეტში ვკითხულობ: „ხალხო რა მოხდა ვარკეთილში? ბექა მარგიშვილი მოკლეს?“ ამას კითხულობს დედა, რომელსაც იმ წამს სული ამოუვიდა“.

მისივე თქმით, მალევე ნათესავები დაუკავშირდნენ და ბექას გარდაცვალების ამბავი გააგებინეს.

ირმა ზანდარაშვილის ჩვენების მიხედვით, იგი საზღვარგარეთ ოჯახური მდგომარეობის გამო წავიდა. იმ პერიოდში ბექა ზრუნავდა მასზე უმცროს ძმაზე: „მე ასეთი გამწარებული დედა ვარ, გავიარო და მეც დავხოცო სხვისი შვილები?! ... ბექას ახალგაზრდა დედა 80 წლის მოხუცს დაემგვანა“.

15 –წუთიანი საუბრის განმავლობაში ირმა ზანდარაშვილმა მოასამართლეს უთხრა, რომ შალვა აბულაძეს ის მიუსაჯონ, რაც კანონმდებლობით დაიმსახურა.

„კიდევ ვამბობ, უფალმა შეუნდოს შალვას რაც გააკეთა. ახლა ჩემი შვილის სული მიყურებს, ჩემ შვილს აღარ შია, მას არც თმა და აღარც ფრჩხილი ეზრდება. ახლაც ვლოცულობ შალვასთვის, ეს ადამიანი არც ამ სამყაროშია და არც იქით, მეცოდება“, – ასე დაასრულა ჩვენება გარდაცვლილი ბექა მარგიშვილის დედამ დღევანდელ სასამართლო პროცესზე.

შეგახსენებთ, რომ დღეს, 1 ოქტომბერს, ახალციხის რაიონულ სასამართლოში, პოლიციელების მკვლელობაში ბრალდებულის შალვა აბულაძის სასამართლო პროცესზე გარდაცვლილი ბექა მარგიშვილის დედა, შემთხვევის დროს თბილისში დაჭრილი პოლიციელი და ექსპერტები დაკითხეს. პროცესს ბრალდებული არ დასწრებია, მან სასამართლოს წერილი გამოუგზავნა, რომელიც პროცესზე მისმა ადვოკატმა, შალვა ხაჭაპურიძემ წაიკითხა. წერილში აბულაძე დაუსწრებლობის მიზეზს განმარტავდა.

[ვარლამ წიკლაური, ახალციხე]