"ჯინო ველნეს რაბათის" წინააღმდეგ სამოქალაქო სარჩელი არ დაკმაყოფილდა

ბერიძის სამოქალაქო სარჩელზე გადაწყვეტილება მოსამართლემ დღეს, 30 სექტემბერს გამოაცხადა. მჭედლიშვილმა მოსარჩელეს მოთხოვნა, სამსახურში დაბრუნებასა და იძულებით განაცდურის ანაზღაურების შესახებ, არ დააკმაყოფილა. როგორც მან სასამართლო დარბაზში განმარტა შინაგანაწესი ხელშეკრულების შემადგენელი ნაწილია და როგორც შინაგანაწესში წერია, სამუშაო საათებში ინტერნეტით სარგებლობა იკრძალება.

"რაც შეეხება შაორშაძის მიერ ბერიძის ცემის ფაქტს, ეს არ ადასტურებს იმას, რომ ბერიძე სამუშაო საათებში ტელეფონით სარგებლობდა", – განაცხადა მოსამართლემ.

გადაწყვეტილების გამოცხადებას, მოპასუხე მხარე „ჯინო ველნეს რაბათის“ იურისტი მამია ბერიძე არ ესწრებოდა. თუმცა, პროცესზე იმყოფებოდა "ჯინო ველნეს რაბათის" მენეჯერი თეონა ჩოკოლაშვილი. მან სასამართლო უკომენტაროდ დატოვა.

კომენტარი არც ბერიძეს გაუკეთებია, თუმცა როგორც მისმა ადვოკატმა განაცხადა, მოსამართლის გადაწყვეტილება უსაფუძვლოა და მისი ჩაბარების შემდეგ აუცილებლად გაასაჩივრებენ.

შეგახსენებთ, სასტუმრო „ჯინო ველნესის“ წინააღმდეგ ყოფილმა თანამშრომელმა ახალციხის სასამართლოში სარჩელი 3 აგვისტოს შეიტანა. ნინო ბერიძე მისი გათავისუფლების შესახებ ბრძანების ბათილად ცნობას, სამსახურში აღდგენას და იძულებით განაცდური საათების ანაზღაურებას ითხოვდა.

[თამუნა უჩიძე, ახალციხე]