„ჯინო ველნეს რაბათის“ წინააღმდეგ სამოქალაქო საქმის გამოკვლევა დასრულდა

დღეს, 22 სექტემბერს ახალციხის რაიონულ სასამართლოში სასტუმრო „ჯინო ველნეს რაბათის“ წინააღმდეგ ყოფილი თანამშრომლის ნინო ბერიძის სამოქალაქო საქმეზე ბოლო მოწმე დაკითხეს. სასტუმროს დაცვის თანამშრომელმა ლაშა მარტინენკომ განაცხადა, რომ პირადად მას ნინო ბერიძისთვის იმის გამო, რომ სამუშაო საათებში ტელეფონით სარგებლობდა, შენიშვნა არა ერთხელ მიუცია.

მარტინენკოს განმარტებითვე, სამსახურში გარკვეული პერიოდის განმავლობაში, თანამშრომლებს ტელეფონები ჩამორთმეული ჰქონდათ, ამის კონტროლი კი დაცვის წევრებს უნდა განეხორციელებინათ.

როგორც მარტინენკო ამბობს, საყვედური ადმინისტრაციისგან პირადად მასაც მიუღია, თუმცა აღნიშნული არ გაუსაჩივრებია: „არ მახსოვს საყვედური რაზე მომცეს, მაგრამ დამნაშავე ვიყავი და არ გამიპროტესტებია“.

საპაექრო სიტყვაში ნინო ბერიძის ადვოკატმა იოსებ ხითარიშვილმა აქცენტი სწორედ თანამშრომლებისთვის გამოცხადებულ საყვედურებზე გააკეთა იმ კუთხით, რომ საყვედურის გაპროტესტებას ადმინისტრაციასთან ვერავინ ბედავდა: „თუ ვინმე ახსნა– განარტებას დაწერდა, სამსახურიდან გაათავისუფლებდნენ. ეს მოწმეების ჩვენებებიდანაც დადასტურდა. სამწუხაროა, რომ ამ სასტუმროში კანონის არსებობის შესახებ არაფერი იციან და თანამშრომლების უფლებებს ლახავენ“.

მისივე თქმით, საყვედურები ბერიძეს მიზანმიმართულად იმისთვის გამოუცხადეს, რომ საბოლოოდ სამსახურიდან გასათავისუფლებლად საფუძველი შეექმნათ: „ეს საყვედურები დამსახურებულადაც რომ მიეღო, უკანონოა სასტიკი საყვედური თანამშრომელს პირდაპირ გაფრთხილების გარეშე რომ მისცე“.

არ დაეთანხმა ხითარიშვილს მოპასუხე მხარე. „ჯინო ველნეს რაბათის“ წარმომადგენლის მამია ბერიძის განცხადებით, ეს საყვედურები სწორედაც რომ გაფრთხილება იყო: „ბერიძეს ყველა მათგანზე ხელი აქვს მოწერილი“.

რაც შეეხება კანონის არ ცოდნას, მამია ბერიძე ამბობს: „მიხარია ამაზე რომ საუბრობთ. აქცენტს სასტუმროში ზოგადად არსებულ მძიმე გარემოზე აკეთებთ, ეს იმიტომ, რომ კონკრეტულ საქმეზე სათქმელი არაფერი გაქვთ“.

სასამართლოში საქმის გამოკვლევა დასრულდა, მოსამართლე სარეზოლუციო ნაწილს 30 სექტემბერს 11:00 საათზე გამოაცხადებს.

შეგახსენებთ, სასტუმრო „ჯინო ველნესის“ წინააღმდეგ ყოფილმა თანამშრომელმა ახალციხის სასამართლოში სარჩელი 3 აგვისტოს შეიტანა. ნინო ბერიძე მისი გათავისუფლების შესახებ ბრძანების ბათილად ცნობას, სამსახურში აღდგენას და იძულებით განაცდური საათების ანაზღაურებას ითხოვს.

[თამუნა უჩიძე, ახალციხე]