სასამართლომ 'ჯინო ველნესის' ყოფილი თანამშრომლის საქმის განხილვა დაიწყო

სასტუმრო „ჯინო ველნეს რაბათიდან“ გათავისუფლებული თანამშრომელი ნინო ბერიძე სასტუმროს მენეჯერ–ბუღალტერს ფიზიკურ და სიტყვიერ შეურაცხყოფაში ადანაშაულებს. ბერიძე სამსახურიდან 12 ივლისს გაათავისუფლეს.

ცემის ფაქტზე გამოძიება დაწყებულია. საქმეს ახალციხის რაიონული პროკურატურა, საქართველოს სისხლის სამართლის კოდექსის 125 მუხლის პირველი ნაწილით იძიებს. რაც ცემას ან სხვაგვარ ძალადობას გულისხმობს, რამაც დაზარალებულის ფიზიკური ტკივილი გამოიწვია, მაგრამ ფაქტს ჯანმრთელობის განზრახ მსუბუქი დაზიანება არ მოჰყოლია.

აღნიშნულ საქმეზე დღეს ახალციხის რაიონულ სასამართლოში წინასასამართლო სხდომა გაიმართა. დღევანდელ სხდომაზე საქმეზე წარდგენილი მტკიცებულებები დასაშვებად იქნა ცნობილი და დაინიშნა მთავარი სხდომა, რომელიც 24 სექტემბერს 12:00 საათზე გაიმართება.

შეგახსენებთ, რომ ნინო ბერიძემ სასტუმრო „ჯინო ველნესის“ წინააღმდეგ ახალციხის რაიონულ სასამართლოში კიდევ ერთი სარჩელი შეიტანა. ბერიძე მისი გათავისუფლების შესახებ ბრძანების ბათილად ცნობას, სამსახურში აღდგენას და იძულებით განაცდური საათების ანაზღაურებას ითხოვს. აღნიშნულ საქმეზე სხდომა გუშინ, 9 სექტემბერს იყო ჩანიშნული, თუმცა გადაიდო. მომდევნო სხდომა 15 სექტემბერს 10:00 საათზე გაიმართება.

[თამარ თოთაძე, ახალციხე]