სასტუმრო ‘ჯინო ველნეს რაბათის’ ბუღალტერი სასამართლომ დამნაშავედ ცნო

სასტუმრო „ჯინო ველნეს რაბათის“ ყოფილ ბუღალტერს თამარ შაორშაძეს ბრალი სისხლის სამართლის კოდექსის 125–ე მუხლის პირველი ნაწილით, ცემაში ედება. საქმეში დაზარალებული ამავე სასტუმროს მიმტანი ნინო ბერიძეა.

„შაორშაძემ ბერიძეს მარჯვენა და მარცხენა ბეჭის არეში დაარტყა და იგივე კიდევ გააგრძელა. აღნიშნული ფაქტი შემსწრე მოწმეებისა და სათვალთვალო კამერების ჩანაწერებითაც დასტურდება“, – განაცხადა შესავალ სიტყვაში პროკურორმა გიორგი აღლემაშვილმა.

პროკურორს შაორშაძეც დაეთანხმა. მან ბრალი აღიარა და განაცხდა, რომ შესავალ სიტყვაში სათქმელი სხვა არაფერი აქვს: „ნინოს სხვა თანამშრომლებისთვისაც სიტყვიერი შეურაცხყოფა არა ერთხელ მიუყენებია. უბრალოდ არ უნდა ავყოლოდი“.

შესავალი სიტყვების შემდეგ სასამართლომ დასკვნითი სიტყვები ისე მოისმინა, რომ მტკიცებულებების გამოკვლევაზე არ უმსჯელიათ: დაცვის მხარემ ბრალდების მხარის ყველა მტკიცებულება უდავოდ ცნო.

შაორშაძეს არც დასკვინითი სიტყვა წაუკითხავს, საბოლოო სიტყვაში კი განაცხადა: „გთხოვთ გაითვალისწინოთ განაჩენის გამოტანისას, რომ ამჟამად უმუშევარი ვარ, ბუნებრივია ჯარიმას გადავიხდი, თუმცა გამიჭირდება“.

მოსამართლემ ბრლადებულის თხოვნა გაითვალისწინა. გოჩა ჯეირანაშვილმა შაორშაძეს 500 ლარის გადახდა დააკისრა: „სასამართლომ გაითვალისწინა ის, რომ ბრალს აღიარებთ და ინანიებთ. 500 ლარი ჯარიმის მუნიმალური ოდენობაა, კანონი ამაზე ნაკლებს არ ითვალისწინებს“.

შაორშაძე ახალციხის რაიონული სასამართლოს გადაწყვეტილებას არ გაასაჩივრებს.

შეგახსენებთ, რომ „ჯინო ველნეს რაბათის“ მიმტანი ნინო ბერიძე 12 ივლისს გაათავისუფლეს. ამ დღეს ბერიძის მობილური ტელეფონი შაორშაძემ სამზარეულოს უჯრაში უპოვა. თანამშრომელბს სამუშაო საათებში ტელეფონით საუბარი ეკრძალებოდათ. ურთიერთშელაპარაკება სწორედ ამას მოჰყვა. სამსახურიდან გათავისუფლებულმა ბერიძემ შაორშაძეს უჩივლა.

გარდა სისხლის სამართლის საქმისა, სასამართლოში ბერიძის სამოქალაქო საქმეც განიხილება, იგი სამსახურში დაბრუნებას და განაცდური საათების ანაზღაურებას ითხოვს. სარეზოლუციო ნაწილი აღნიშნულ დავაზე თვის ბოლოს გამოცხადდება.

[თამუნა უჩიძე, ახალციხე]