„ჯინო ველნესის“ ყოფილი თანამშრომლის საჩივარი სასამართლომ წარმოებაში მიიღო

სასტუმრო „ჯინო ველნესის“ წინააღმდეგ ყოფილმა თანამშრომელმა ნინო ბერიძემ, ახალციხის რაიონულ სასამართლოში საჩივარი 3 აგვისტოს შეიტანა. სასამართლომ საქმე წარმოებაში უკვე მიიღო.

„მასალები გადაეგზავნა მოპასუხე მხარეს, რომელსაც განესაზღვრა შესაგებლის წარმოსადგენად 10 დღიანი ვადა. ამის შემდეგ ჩაინიშნება სასამართლო პროცესი“, – ამბობს ნინო ბერიძის ადვოკატი სოსო ხითარიშვილი.

შეგახსენებთ, რომ სასტუმრო „ჯინო ველნეს რაბათიდან“ მიმტანი ნინო ბერიძე 12 ივლისს გაათავისუფლეს. ბერიძე სასტუმროს მენეჯერ–ბუღალტერს ფიზიკურ და სიტყვიერ შეურაწყოფაში ადანაშაულებს.

ცემის ფაქტზე გამოძიება უკვე დაიწყო. საქმეს ახალციხის რაიონული პროკურატურა, საქართველოს სისხლის სამართლის კოდექსის 125 მუხლის პირველი ნაწილით იძიებს. რაც ცემას ან სხვაგვარ ძალადობას გულისხმობს, რამაც დაზარალებულის ფიზიკური ტკივილი გამოიწვია, მაგრამ ფაქტს ჯანმრთელობის განზრახ მსუბუქი დაზიანება არ მოჰყოლია.

[თინათინ ზაზაძე, ახალციხე]