ახალციხეში ევროინტეგრაციაზე იმსჯელეს

აღმოსავლეთ-დასავლეთის მართვის ინსტიტუტის და ევროპულ და ევროატლანტიკურ სტრუქტურებში ინტეგრაციის საკითხებში საქართველოს სახელმწიფო მინისტრის აპარატის ორგანიზებით, ახალციხეში გაიმართა სემინარი თემაზე: “მითები და რეალობა ევროინტეგრაციის თაობაზე“.

„სემინარის მთავარი თემაა ევროკავშირთან ინტეგრაცია, ის პოზიტივი, რაც შეიძლება ინტეგრაციამ მოგვიტანოს. ასევე შევეხეთ იმ მითებს, რომელიც სამწუხაროდ ამ თემის გარშემო არსებობს“, - ამბობს ევროპულ და ევროატლანტიკურ სტრუქტურებში ინტეგრაციის საკითხებში საქართველოს სახელმწიფო მინისტრის პირველი მოადგილე არჩილ ყარაულაშვილი.

გარდა ამისა, დღევანდელ შეხვედრაზე სხვადასხვა სფეროს ექსპერტებმა ისაუბრეს ევროკავშირსა და საქართველოს შორის ასოცირების შეთანხმებაზე, ევროკავშირში უვიზო მიმოსვლის პერსპექტივებსა და წესებზე, ევროკავშირთან ეკონომიკურ ურთიერთობებზე, რეგიონებისთვის თავისუფალი ვაჭრობის რეჟიმის შესაძლებლობებზე, ასევე რეფორმებზე სოფლის მეურნეობის სფეროში და სურსათის უვნებლობის საკითხებზე.

„ბოლო პერიოდში ქვეყანაში გავრცელებულია არაერთი არასწორი ინფორმაცია და მითები იმის შესახებ, თუ რას წარმოადგენს ევროინტეგრაცია. თითქოს გარკვეულ წინააღმდეგობაში მოდის ქართულ ტრადიციებთან, ქართულ კულტურასთან, არსებობს რაღაც საფრთხეები და ასე შემდეგ. სინამდვილეში, ასოცირების შეთანხმება, რომელიც საქართველომ ერთი წლის წინ გააფორმა, ძალიან დიდ შესაძლებლობებს იძლევა“, – ამბობს აღმოსავლეთ–დასავლეთის მართვის ინსტიტუტის მრჩეველი ნოდარ ტანგიაშვილი და ამატებს, რომ გარდა ამისა არსებობს მითები იმის შესახებ, რომ თითქოს ეს წინააღმდეგობაში მოდის რუსეთთან ურთიერთობისას, თუმცა ეს სინამდვილეს არ შეესაბამება.

შეხვედრას ადიგენის, ასპინძის, ახალციხისა და ბორჯომის მუნიციპალიტეტების ადგილობრივი თვითმმართველობის ხელმძღვანელი პირები, ასევე სამხარეო ადმინისტრაციისა და არასამთავრობო სექტორის წარმომადგენლები ესწრებოდნენ.

ღონისძიება აღმოსავლეთ-დასავლეთის მართვის ინსტიტუტის (EWMI) სამოქალაქო საზოგადოების განვითარებისა და მოქალაქეთა ჩართულობის პროექტის (ACCESS) ფარგლებში გაიმართა, რომელსაც აფინანსებს ამერიკის შეერთებული შტატების საერთაშორისო განვითარების სააგენტო (USAID).

[თამარ თოთაძე, ახალციხე]