ახალციხეში ეთნიკური უმცირესობების ფორუმი გაიმართა

„ეთნიკური უმცირესობების ფორუმი“, დღეს, 24 ივნისს, ორგანიზაცია „ახალგაზრდა ადვოკატების“ ორგანიზებით მოეწყო.
ფორუმს შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატისა და ევროპულ და ევროატლანტიკურ სტრუქტურებში საქართველოს სახელმწიფო მინისტრის აპარატის, ასევე, ახალციხის სამოქალაქო სექტორის, ადგილობრივი თვითმმართველობის, მხარის რწმუნებულის აპარატისა და უნივერსიტეტის წარმომადგენლები დაესწრნენ.

„ეთნიკური უმცირესობები სათანადოდ არ არიან ინფორმირებული იმის შესახებ, რა პასუხისმგებლობასთანაა დაკავშირებული ევროინტეგრაციის პროცესი. პრობლემების დაძლევისთვის საჭიროა მათ იცოდნენ ევროპული არჩევანის სიკეთეებისა და მნიშვნელობის შესახებ“, – განაცხადა „ახალგაზრდა ადვოკატების“ ხელმძღვანელმა არჩილ კაიკაციშვილმა.

სამოქალაქო თანასწორობის საკითხებში სახელმწოფო მინისტრის აპარატის სამოქალაქო ინტეგრაციის სამმართველოს უფროსის თინა ღოღელიანის თქმით, ძალიან მნიშვნელოვანია ეთნიკური უმცირესობები სრულფასოვნად იყვნენ ჩართული ქვეყანაში მიმდინარე პროცესებში: „სახელმწიფო პოლიტკის ერთ–ერთ მნიშვნელოვან პრიორიტეტს წარმომადგენს ეთნიკური უმცირესობების სამოქალაქო ინტეგრაცია. ეს არის ერთის მხრივ ეთნიკური უმცირესობების უფლებების დაცვის ხელშეწყობა, მეორე მხრივ, მათი კულტურული იდენტობის შენარჩუნება, საზოგადოებაში ტოლერანტული გარემოს გაძლიერება და შემდგომი განვითარება“.

ეთნიკური უმცირესობები ამბობენ, რომ მსგავსი შეხვედრები ხშირად უნდა იმართებოდეს. ასევე ხშირად უნდა რიგდებოდეს საინფორმაციო ბროშურებიც.

„საინტერესო შეხვედრა იყო. ძალიან მნიშვნელოვანია, რომ ეთნიკურმა უმცირესოების წარმომადგენლებმა კარგად გაიგონ, რა არის ევროინტეგრაცია და მასთან დაკავშირებული საკითხები“, – ამბობს ედუარდ აივაზიანი.

„ახალგაზრდა ადვოკატები“ პროექტს „ეთნიკური უმცირესოებების ფორუმი“ „ეთნოსთა შორის თანამშრომლობისა და კონსულტაციების ანალიტიკური ცენტრის – ACICC“–ის 2015 წლის მცირე გრანტების აღმოსავლეთ პარტნიორობის უმცირესობათა ქსელის პროგრამის ფარგლებში ახორციელებს. მსგავსი შეხვედრა მარნეულშიც გაიმართება.

[თინათინ ზაზაძე, ახალციხე]