აღმოსავლეთ–დასავლეთის მართვის ინსტიტუტის საანგარიშო შეხვერდა ახალციხეში

შეხვედრა ახალციხის დემოკრატიული ჩართულობის ცენტრში დღეს, 30 ნოემბერს გაიმართა. შეხვედრას ადგილობრივი არასამთავრობო ორგანიზაციებისა და მედიის წარმომადგენლები დაესწრნენ.

აღმოსავლეთ-დასავლეთის მართვის ინსტიტუტის დირექტორის მოადგილის ეკა იმერლიშვილის თქმით, მნიშვნელოვანია დონორმა ორგანიზაციებმა ყოველწლიური ანგარიში წარუდგინონ იმ ორგანიზაციებს, რომლებსაც თავად აფინანსებენ.

შეხვედრაზე ეკა იმერლიშვილმა არასამთავრობო ორგანიზაციებსა და მოქალაქეებს შორის თანამშრომლობის გაზრდაზე და არასამთავრობო ორგანიზაციების მხარდაჭერაზე ისაუბრა.

„ჩვენ უკვე მესამე წელია ვატარებთ ასეთ შეხვედრებს და ვისმენთ ორგანიზაციების შეკითხვებსა და რეკომენდაციებს, იმის შესახებ თუ როგორ შეიძლება სხვადასხვა პროექტებზე კორექტირებები ისე, რომ მათთვის მიმზიდველი გახდეს“, - ამბობს ეკა იმერლიშვილი.

შეხვედრაზე, ასევე გაიმართა დისკუსია, რომელზეც არასამთავრობო ორგანიზაციების წარმომადგენლები ძირითადად გრანტებთან დაკავშირებული საკითხებით დაინტერსედნენ.

საუბარი შეეხო საგრანტო პროგრამებში ადგილობრივი არასამთავრობო ორგანიზაციების ჩართულობასაც.

„დღევანდელ შეხვედრაზე დონორ ორგანიზაციასთან, ჩემი რეკომენდაცია ის იყო, რომ ადგილობრივ ორგანიზაციებს მოგვეცეს საშუალება გავხდეთ განმახორციელებელი ორგანიზაციები რეგიონში და აღარ ვიყოთ ცენტრალური ორგანიზაციების პარტნიორები“, -ამბობს „დემოკრატ მესხთა კავშირის“ წარმომადგენელი ჯაბა ნათენაძე.

დღესვე ეკა იმერლიშვილმა შეხვედრის მონაწილეებს ორი საგრანტო პროექტი გააცნო, რომლებზეც კონკურსი მიმდინარე თვეში გამოცხადდა.
იმერლიშვილის განცხადებით, ორივე მათგანი ეხება, ანტიდასავლური დეზინფორმაციის წინააღმდეგ მიმართულ ღონისძიებებსა და კვლევებს.

აღმოსავლეთ-დასავლეთის მართვის ინსტიტუტი (EWMI) 2014 წლის ნოემბრიდან ახორციელებს 5.5 მილიონი აშშ დოლარის ღირებულების პროექტს - „სამოქალაქო საზოგადოების განვითარებისა და მოქალაქეების ჩართულობის პროექტი“ (ACCESS). პროექტის მიზანია არასამთავრობო ორგანიზაციებსა და მოქალაქეებს შორის თანამშრომლობის გაზრდა და არასამთავრობო ორგანიზაციების განვითარების მხარდაჭერა.

[ლუბა გიორგაძე, ახალციხე]