სამცხე–ჯავახეთში რეგიონის განვითარების სტრატეგიული გეგმის განახლებაზე მსჯელობენ

სტრატეგიული გეგმის განახლებაზე სამცხე–ჯავახეთის სამხარეო ადმინისტრაციისა და რეგიონის შვიდივე მუნიციპალიტეტის ხელმძღვანელები, გერმანიის საერთაშორისო განვითარების საზოგადოებისა (GIZ) და პოლიტიკისა და მართვის კონსალტინგ ჯგუფის (PMCG) წარმომადგენლებთან ერთად მუშაობენ.

„მეორე წელია, რაც აღნიშნულ გეგმაზე ვმუშაობთ. წელს გაცილებით დახვეწილია ეს პროცესი, რამდენადაც განმეორებით ხდება ამ გეგმის შემუშავება. შემუშავებულია შესაბამისი მეთოდოლოგია და დამტკიცებულია საქართველოს მთავრობის მიერ, რომლის მიხედვითაც ამ პროცესის ინიცირება და შემდგომ უკვე გეგმის განახლება ხდება. შარშან ჩადებული პროექტებს გადავხედავთ და ახალ პროექტებს დავგეგმავთ“, – ამბობს „გერმანიის საერთაშორისო განვითარების საზოგადოება, ადგილობრივი თვითმმართველობის პროგრამა კავკასიაში“ პროგრამის მრჩეველი არჩილ ჟორჟოლიანი.

სამცხე–ჯავახეთის რეგიონის განვითარების სტრატეგიული გეგმა, რომელიც 2017 წლამდეა გაწერილი, 2014 წელს დაამტკიცეს.

„დღევანდელ შეხვედრაზე განვიხილავთ იმ პროგრესს, რასაც მუნიციპალიტეტებმა წინა წლის სამუშაო გეგმის შესრულებაში მიაღწიეს. ამ პროგრესის შესაბამისად უნდა დავგეგმოთ ის ძირითადი საქმიანობები, რასაც 2016–2017 წელს განახორციელებენ“, – ამბობს პოლიტიკისა და მართვის კონსალტინგ ჯგუფის წარმომადგენელი ვანო თავაძე.

[თამარ თოთაძე, ახალციხე]