სამცხე-ჯავახეთის განვითარების სტრატეგიული გეგმის განხილვას საქართველოს სოფლის მეურნეობისა და რეგიონული განვითარების სამინისტროების წარმომადგენლები, მხარისა და მუნიციპალიტეტების პირველი პირები, სამხარეო ადმინისტრაციის თანამშრომლები, რეგიონში მოქმედი ადგილობრივი და საერთაშორისო არასამთავრობო ორგანიზაციებისა და მედიის წარმომადგენლები ესწრებოდნენ.
დოკუმენტში, რომელზე მუშაობაც 2012 წლიდან დაიწყო, მოცემულია რეგიონის განვითარების პერსპექტივები ოთხი მიმართულებით: ეკონომიკა, სოფლის მეურნეობა, სოციალური განვითარება და ჯანდაცვა და ბუნებრივი რესურსების მართვა და გარემოს დაცვა.
„ამ ოთხი მიმართულების შესაბამისად, ცალკეული სამინისტროების წარმომადგენლებს ვთხოვეთ, ჩამოსულიყვნენ და ესაუბრათ, რა გეგმებია კონკრეტული დარგების მიხედვით საქართველოში და როგორია სამცხე-ჯავახეთის განვითარების ხედვა“, - განმარტავს სამცხე-ჯავახეთის სამხარეო ადმინისტრაციის რეგიონული განვითარების სამსახურის უფროსი მარინა გაჩეჩილაძე.
სამცხე-ჯავახეთის განვითარების სტრატეგიული გეგმა საქართველოს რეგიონული განვითარებისა და ინფრატრუქტურის სამინისტროს მოთხოვნის საფუძველზე შემუშავდა. აღნიშნული სამინისტროს წარმომადგენლის, ლამარა ბერიძის თქმით, 2010-2017 წლების საქართველოს რეგიონული განვითარების სახელმწიფო სტრატეგიიდან გამომდინარე, რეგიონის განვითარების სტრატეგიული გეგმა პირველად იმერეთისა და მცხეთა-მთიანეთის რეგიონებში შემუშავდა, შემდეგ კი საქართველოს დანარჩენ შვიდ რეგიონში.
რეგიონული განვითარების სტრატეგიის შედგენის პროცესის ექსპერტული, ტექნიკური და ინფორმაციული მხარდაჭერა გერმანიის საერთაშორისო თანამშრომლობის საზოგადოებამ (GIZ) უზრუნველყო. ამავე მიზნით აღნიშნულმა ორგანიზაციამ ადგილობრივი საკონსულტაციო კომპანია – პოლიტიკისა და მართვის კონსალტინგ ჯგუფი(PMCG) დაიქირავა, რომლის კონსულტანტებმაც საწყის ეტაპზე სამუშაო ჯგუფის ხელმძღვანელებსა და წევრებთან ერთად სიტუაციური და ფაქტორული ანალიზის შედგენაში მიიღეს მონაწილეობა. შემდეგ კი ფასილიტაცია გაუწიეს სამუშაო ჯგუფების საქმიანობას ხედვისა და განვითარების სტრატეგიული პრიორიტეტების შესამუშავებლად.
„საკმაოდ ინტენსიური მუშაობა მიმდინარეობდა ამ კუთხით და საბოლოო ჯამში მიღებულია დოკუმენტი, რომელიც განხილული იყო ჯერ ადგილობრივ დონეზე, შემდეგ კი ცენტრალურ დონეზე, ასევე მინისტრთა კაბინეტში. შემდეგ მიღებული და დამტკიცებული იყო საქართველოს მთავრობის მიერ. დოკუმენტი განსაზღვრავს რეგიონის განვითარების გეგმას, სტრატეგიულ ამოცანებს, საით უნდა წავიდეს რეგიონი დღეიდან 2021 წლამდე“, - ამბობს ”გერმანიის საერთაშორისო განვითარების საზოგადოება, ადგილობრივი თვითმმართველობის პროგრამა კავკასიაში” პროგრამის მრჩეველი არჩილ ჟორჟოლიანი.
სამცხე-ჯავახეთის სამხარეო ადმინისტრაციაში განმარტავენ, რომ ამის შემდგომ მომზადდება სამოქმედო გეგმა, რომელშიც რეგიონში დაგეგმილი კონკრეტული ღონისძიებები გაიწერება.
„წლების მიხედვით უნდა დავსახოთ, რას და როგორ გავაკეთებთ“, - ამბობს მარინა გაჩეჩილაძე.
[თამარ თოთაძე, ახალციხე]