სამცხე-ჯავახეთში რეგიონის განვითარების სტრატეგიაზე მუშაობენ

რეგიონის განვითარების სტრატეგიული გეგმა საქართველოს რეგიონული განვითარებისა და ინფრასტრუქტურის სამინისტროს მოთხოვნის საფუძველზე შემუშავდა.რამდენიმე დღის განმავლობაში დოკუმენტი დეტალურად უნდა განიხილონ სხვადასხვა მიმართულების სამუშაო ჯგუფებმა.

სტრატეგიული გეგმა დღეს, 21 მარტს, ეკონომიკისა და სოციალური განვითარების ჯგუფმა განიხილლა. ხვალ კი სასოფლო-სამეურნეო, ბუნებრივი რესურსებისა და გარემოს დაცვის ჯგუფები გაეცნობიან.

”ოთხივე მიმართულებით შემუშავებულია გარკვეული ანგარიში, სადაც დეტალურადაა აღწერილი თუ რა პოტენციალი გააჩნია რეგიონს, რა სუსტი მხარეები არსებობს და სად არის საჭირო დამატებითი ყურადღების მიქცევა”, - განმარტავს ”გერმანიის საერთაშორისო განვითარების საზოგადოება, ადგილობრივი თვითმმართველობის პროგრამა კავკასიაში” პროგრამის მრჩეველი არჩილ ჟორჟოლიანი.

აღნიშნულ ჯგუფებში სამცხე-ჯავახეთის რეგიონის ყველა მუნიციპალტეტის მუნიციპალური სამსახურების თანამშრომლები, რეგიონში მოქმედი არასამთავრობო ორგანიზაციებისა და აკადემიური სექტორის წარმომადგენლები არიან ჩართული.

რეგიონული განვითარების სტრატეგიულ გეგმაზე მუშაობა გასულ წელს დაიწყო.

”სამუშაო ჯგუფებთან მომდევნო შეხვედრა სავაურაუდოდ აპრილში შედგება, რომელზეც განიხილავენ კონკრეტულად რა პრიორიტეტები შეიძლება გამოიკვეთოს რეგიონული განვითარების თვალსაზრისით. ამის შემდეგ რეგიონული განვითარების საბჭო შეიკრიბება და საბოლოო დოკუმენტზე ჩამოყალიბდება, - ამბობს არჩილ ჟორჟოლიანი და ამატებს, რომ თუ აღნიშნულ დოკუმენტს რეგიონული საბჭო მოიწონებს, იგი საქართველოს რეგიონული განვითარებისა და ინფრასტრუქტურის სამინისტროს გადაეგზავნება: ხოლო, სამინისტრო, თავის მხრივ, კომენტარების არარსებობის შემთხვევაში, რეგიონის განვითარების სტრატეგიას დასამატკიცებლად სამთავრობო დონეზე წარადგენს”.

[თამარ თოთაძე, ახალციხე]