სამცხე–ჯავახეთის საკონსულტაციო საბჭო სამუშაო შეხვედრებს მართავს

ინფრასტრუქტურისა და ტურიზმის განვითარების, ბიზნესისა და სოფლის მეურნეობის ხელსეწყობის, ჯანდაცვისა და სოციალური განვითარების, განათლებისა და კულტურის, ასევე, გარემოს დაცვის კუთხით შექმნილი სამუშაო ჯგუფები სამცხე–ჯავახეთის რეგიონის განვითარების სტრატეგიაზე მუშაობენ. მუნიციპალიტეტების წარმომადგენლები დღეს იმ პროექტებს წარმოადგენენ, რომლებიც მომავალში რეგიონის განვითარების სტრატეგიულ გეგმაში იქნება შესული.

„ამ სამოქმედო გეგმის შემუშავების პროცესში ხდება კონკრეტული სამუშაო ჯგუფების მიერ პროექტების წარმოდგენა, ამ პროექტების განხილვა და მათი შეფასება. შესაბამისად მოხდება ამ პროექტების შერჩევა და პრიორიტეტების მიხედვით რანგირება“, – ამბობს რეგიონული განვითარებისა და ინფრასტრუქტურის სამინისტროს თვითმმართველობის განვითარებისა და რეგიონული დეცენტრალიზაციის პოლიტიკის სამმართველოს უფროსი ოთარ კონჯარია.

ის პროექტები, რომლებსაც სამუშაო ჯგუფები წარადგენენ გაიფილტრება და საბოლოოდ პრიორიტეტები რეგიონის განვითარების სტრატეგიულ გეგმაში აისახება.

„ამ სამუშაო შეხვედრების შემდეგ გადაწყდება, თუ რომელი პროექტის ასახვა უნდა მოხდეს საბოლოოდ რეგიონის განვითარების სამოქმედო გეგმაში. ასევე, იქნება გადაწყვეტილი რა ტიპის პროექტებს მიენიჭება პრიორიტეტი“, – ამბობს „გერმანიის საერთაშორისო თანამშრომლობის საზოგადოება, ადგილობრივი თვითმმართველობის პროგრამა კავკასიაში” პროგრამის მრჩეველი არჩილ ჟორჟოლიანი.

სამცხე-ჯავახეთის სამხარეო ადმინისტრაციის რეგიონული განვითარების სამსახურის უფროსის მარინა გაჩეჩილაძის თქმით, რეგიონის განვითარების სტრატეგიული გეგმა არ იქნება მხოლოდ დოკუმენტი.

„ამ გეგმის შემუშავებაში ჩართულია ყველა ის სამსახური, ვისაც შეიძლება რაიმე ვკითხოთ. მნიშვნელოვანია, რომ ეს არ იქნება დოკუმენტი დოკუმენტისთვის, ამას ამტკიცებს გუბერნატორის საბჭოც, ამის შემდეგ დოკუმენტი სამინისტროში გაივლის აპრობაციას და მერე მოხდება ამ გეგმის მიღება მთავრობის მიერ“, – ამბობს მარინა გაჩეჩილაძე.

[თამარ თოთაძე, ახალციხე]