პოლიცილების მკვლელობაში ბრალდებული შალვა აბულაძე აცხადებს, რომ ციხეში არაადამიანურად ეპყრობიან

„გასაიდუმლოებულ ციხეში ვზივარ, სადაც მიზანმიმართულად ხდება ყველაფერი. დღემდე აკრძალული მაქვს განცხადებების გაკეთება. იქ სადაც მე ვარ, არ არსებობს სოციალური სამსახური“, – განაცხადა შალვა აბულაძემ სასამართლო პროცესზე.

ბრალდებული აცხადებს, რომ 6 თვეა ერთი და იგივე ტანისამოსით დადის: „დამეხა და მთელი ზაფხული „პროსტინაში“ გავატარე. 119–ე დღეს მომიტანეს ქვედა საცვალი. პროსტინით და ქვედა საცვლის გარეშე პროცესზე ვერ მოვიდოდი. წითელ პარასკევს გამხადეს სამოსი და სხვისი ჩამაცვეს, რაც სეზონის შესაფერისი არ იყო და დღემდე მაცვია. უუფლებო მდგომარეობაში ვარ, 6 თვეა ფრჩხილები არ დამიჭრია, მაღაზიით სარგებლობა მეკრძალება“.

შალვა აბულაძე ირწმუნება, რომ ციხეში არაადამიანურად ეპყრობიან და ეს შესაბამისმა ორგანოებმა უნდა გამოიძონ: „9–ჯერ უვადო პატიმრობა ვერ დამაყრევინებს ფარხმალს, მე ადამიანების მტერი არ ვარ“.

აბულაძე ამბობს, რომ მისი მრავალჯერ ნასამართლევობის შესახებ გავრცელებული ინფორმაციაც არასწორია: „მხოლოდ ერთხელ ვარ ნასამართლევი ადრეულ, ყრმობის ასაკში და ის გაქარწყლებული მაქვს. როგორ ჩავბარდებოდი პოლიციელს, რომელიც 19 წლის გოგოს აწამებდა. 67 წლის მამიდაჩემი მძევლად ყავდათ აყვანილი, მე რომ ჩავბარებოდი. პოლიციელი, რომელიც ბორჯომში გარდაიცვალა, გასარკვევია ჩემი ტყვიით გარდაიცვალა თუ ექიმების დაუდევრობით".

შალვა აბულაძე ამბობს, რომ 11 სექტემბერს, მაშინ როდესაც ბადრაგს თბილისის სასამართლოში მიჰყავდა, მანქანაში ცემეს: "მეუბნეოდნენ რატომ არ აღიარე, რომ პოლიციელები სცემეო“.

შეგახსენებთ, ახალციხის რაიონული სასამართლო დღეს, 8 სექტემბერს, პოლიციელების მკვლელობაში ბრალდებულის, შალვა აბულაძის საქმეს განიხილავს. დღეს პროცესს თავად ბრალდებულიც ესწრება. სასამართლო სხდომა 16:00 საათზე იყო დანიშნული, თუმცა, ბრალდებულისა და ადვოკატების დაგვიანების გამო მოგვიანებით დაიწყო. საქმეს მოასამართლე გოჩა ჯეირანაშვილი განიხილავს.

სასამართლო დარბაზსაც და შენობის მიმდებარე ტერიტორიასაც გაძლიერებული დაცვა იცავს.

სასამართლო პროცესს ბრალდებულის ახლობლები და მეგობრებიც ესწრებიან.

შეგახსენებთ, რომ შალვა აბულაძეს ბრალად ედება: პოლიციელის სიცოცხლის მოსპობა პოლიციელის სამსახურებრივ საქმიანობასთან დაკავშირებით (2 ეპიზოდი), პოლიციელის სიცოცხლის მოსპობის მცდელობა პოლიციელის სამსახურებრივ საქმიანობასთან დაკავშირებით (2 ეპიზოდი) ასევე, ცეცხლსასროლი იარაღის მართლსაწინააღმდეგოდ შეძენა, შენახვა და ტარება და ცეცხლსასროლი იარაღის მართლსაწინააღმდეგოდ შეძენა, შენახვა.

[sknews.ge]