მდინარე მტკვარში წაღვერში მცხოვრებ 33 წლის მამაკაცს ეძებენ

უბედური შემთხვევა გუშინ, მდინარე მტკვარზე დაახლოებით 16:00 საათისთვის მოხდა. ნავი, რომელშიც სამი მამაკაცი იჯდა ამობრუნდა, ორმა ამოსვლა შეძლო, მესამე კი დინებამ გაიტაცა.

„ახალციხიდან ვბრუნდებოდით და სოფელთან რომ მოვედით პოლიცია, სასწრაფო და მაშველები იყვნენ შეკრებილები. ამბობენ ჯომარდობაზე იყვნენ მოხალისეები, ნავი კლდეს შეეჯახა და ამობრუნდა. ერთს დამცავი ჟილეტი არ ეცვა და ნაპირამდე ვერ გამოცურა“, – ამბობს ჭობისხევში მცხოვრები ლია ზაზაძე.

მისი თქმით, დაკარგული მამაკაცი ბორჯომის მუნიციპალიტეტის დაბა წაღვერიდან არის.

ნამდვილად იყო, თუ არა დაკარგული მამაკაცი „ჯომარდობის“ მონაწილე, ამის გარკვევას „სამხრეთის კარიბჭე“ ამ დრომდე უშედეგოდ ცდილობს.

შსს–ში განმარტავენ, რომ სამაშველო ღონისძიებები ამ დრომდე გრძელდება, გამოძიება სსკ-ის 115-ე მუხლით დაიწყო.

[თინათინ ზაზაძე, ბორჯომი]