მტკვარში გადავარდნილი მამაკაცი გარდაცვლილი იპოვეს

მტკვარში გადავარდნილი მამაკაცი გუშინ, 15 ივნისს, საღამოს, 22:00 საათისთვის, ჭობისხევის მიმდებარე ტერიტორიაზე იპოვეს.

„მდინარეში კუნძი იყო, იმაზე იყო წამოდებული, თან წყალსაც მაღლა ამოეტანა“, - ამბობს გამგებლის წარმომადგენელი აწყურის ტერიტორიულ ორგანოში ელგუჯა ჯვარიძე.

გარდაცვლილი უკვე ზიკილიაში, საკუთარ სახლშია გადასვენებული და შაბათს დაკრძალავენ.

ახალციხისა და ბორჯომის სამაშველო სამსახურები, 60 წლამდე ასაკის ზიკილელ მამაკაცს ერთი თვის განმავლობაში ეძებდნენ. სამძებრო სამუშოებს ადიდებული მდინარე ართულებდა.

შეგახსენებთ, რომ ავტოსაგზაო შემთხვევა 15 მაისს, საღამოს მოხდა. სოფელ აწყურთან, ავტომობილი მდინარე მტკირის ხეობაში ჩავარდა. „ნივის“ მარკის ავტომობილში სოფელ ზიკილიაში მცხოვრები ცოლ–ქმარი ისხდა. მანქანა წყალში ჩავარდგნისგან ხეებმა იხსნა, ქალი ავარიას გადაურჩა, მამაკაცი კი მდინარემ გაიტაცა.

მომხდარს შინაგან საქმეთა სამინისტრო, სსკ-ს 276-ე მუხლის პირველი ნაწილით იკვლევს, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.

[ლუბა გიორგაძე, ახალციხე]