ბორჯომში, მდინარე მტკვარში 37 წლის მამაკაცს ეძებენ

ტელეკომპანია "ბორჯომის" ინფორმაციით, შემთხვევის შესახებ შინაგან საქმეთა სამინისტროს ბორჯომის საგანგებო სიტუაციების მართვის სამსახურში შეტყობინება მიმდინარე წლის 14 ოქტომბერს, დღის მეორე ნახევარში შევიდა.

„შემოვიდა შეტყობინება, რომ სავარაუდოდ სილამაზის ხიდის ტერიტორიაზე ჯებირიდან მამაკაცი გადავარდა. აღნიშნული წუთიდან მობილიზებულია, როგორც სამცხე–ჯავახეთის, ასევე ბორჯომის საგანგებო სიტუაციების მართვის სამსახური. ამ დრომდე მიმდინარეობს ინტენსიური საძიებო ღონისძიებები“, – ამბობს შსს–ს ბორჯომის საგანგებო სიტუაციების მართვის სამსახურის უფროსის მოადგილე ლევან ხუციშვილი.

მაშველები დაკარგულ მამაკაცს მდინარე მტკვარში ბორჯომი–ახალდაბის მონაკვეთზე ეძებენ. სამსახურში ამბობენ, რომ მტკვარში დაკარგული მამაკაცის მოძებნა კლიმატური პირობების გამო გართულდა.

37 წლის ხვიჩა მურაჩაშვილი ბორჯომში, ჩარხისწყლის დასახლებაში დედასთან ერთად ცხოვრობს. როგორც მეზობლები ამბობენ, მურაჩაშვილი ციხეში სასჯელს იხდიდა.

[თამარ თოთაძე, ბორჯომი]