მეწყერმა ადიგენის ორი სოფელი გარესამყაროს მოწყვიტა

შემთხვევა დღეს, 30 მარტს, დილით მოხდა.

„მეწყერი, დაახლოებით, 35 მეტრ სიგრძეზე ჩამოწვა და 1.50 სიღმეზე გზა ჩაიტანა. საშიშროებაა, რომ მიწის მასა მდინარ ღაღვში ჩავიდეს და წყალი გადაკეტოს“, – ამბობს ადიგენის მუნიციპალიტეტის მერი ზაქარია ენდელაძე, რომელიც შემთხვევის ადგილზე იმყოფება.

მისი თქმით, დერცელთან მეწყერი ორი დღის წინ დაიძრა: „ვფიქრობდით, რომ საკუთარი ძალებით გავუმკლავდებოდით, დავიწყეთ დაკვირვება და შესწავლა, მაგრამ მდგომარეობა გართულდა. ამიტომ ქვეყნის მასშტაბით, საქმეში ყველა შესაბამისი უწყება ჩავრთეთ“.

ენდელაძის თქმით, მომხდარს გარემოს ეროვნული სანგეტოს გეოლოგები უკვე სწავლობენ, ადგილზე მობილიზებულია სამაშველო სამსახური: „გზაში არიან საგზაო დეპარტამენტის თანამშრომლები, აქაა სამცხე–ჯავახეთის გუბერნატორი. ასევე, მეწყერის ორივე მხარეს ტრასნპორტი გვყავს მობილიზებული და ადგილობრივებს საჭირო ნივთებს ვაწვდით“.

ადიგენის მერიაში ამბობენ, რომ ვიდრე არსებულ ვითარებას კომპეტენტური პირები არ შეისწავლიან, იქ ტექნიკას სამუშაოდ ვერ შეიყვანენ.
„ტექნიკა ვერაფერს იზამს, ველოდებით გეოლოგები რას გვეტყვიან“, – ამბობს მერის მოადგილე არსენ ბალახაშვილი.

სოფელ დერცელში 48, სოფელ კიკიბოში კი 12 ოჯახი ცხოვრობს.

[თამუნა უჩიძე, ადიგენი]