მეექვსე დღეა სოფელ ხევაშენის მოსახლეობას სასმელი წყალი არ მიეწოდება

ადიგენის მუნიციპალიტეტის სოფელ ხევაშენის მოსახლეობას სასმელი წყლის მიწოდება 7 აგვისტოდან შეუწყდა. წყლის მილი, რომლითაც სოფელი მარაგდება, იმ კომპანიის მუშებმა დააზიანეს, რომლებიც აქ სამუშაოებს სოფელ უნწაში წყლის გასაყვანად აწარმოებდნენ.

ადგილობრივებს წყლის მოტანა რამედნიმე ასეული მეტრის მოშორებით მდებარე წყაროდან უხდებათ, თუმცა წყალი აქაც ცოტა მოდის და რიგში საათობით დგანან.

ტენდერში გამარჯვებუილი კომპანიის, შპს „კომუნალური და საირიგაციოს“ ხელმძღვანელი ავთანდილ ძაძამია ამბობს, რომ დაზიანებული მილის დროულად აღსადგენად ყველაფერს აკეთებენ.

„შავი მილი იყო, ვერ დაინახა ექსკავატორის მძღოლმა და დააზიანა. ვერსად ვერ ვშოულობთ. 2010 წელს არის მილი გამოშვებული და საქართველოში არ იყიდება. თურქეთში დავრეკეთ და იმედი გვაქვს, რომ იქ მაინც ვიშოვით. წინააღმდეგ შემთხვევაში დაზიანებული ადგილის სხვა მილით გადაბმა მოგვიხდება“, – ამბობს ავთანდილ ძაძამია.

მისი თქმით მოსახლეობას სასმელი წყლის მიწოდება ორ დღეში აღუდგება.

[თინათინ ზაზაძე, ადიგენი]