ადიგენის სოფლებში განსახორციელებელი 17 პროექტი შეიცვალა

ადიგენის მუნიციპალიტეტში „სოფლის მხარდაჭერის პროგრამის ფარგლებში“ 545. 017 ლარი დაიხარჯება. ზოგიერთ სოფელში სამუშაოები უკვე დაწყებულია, ზოგგან კი პრიორიტეტებს ხელახლა ირჩევენ.

მუნიციპალიტეტის მასშტაბით 55 სოფლში და ორ დაბაში 76 პროექტი განხორციელდება, აქედან 17 –ში პრიორიტეტი შეიცვალა. აღნიშნული ცვლილების შესახებ, საკრებულოს სხდომაზე დღეს, 4 აგვისტოს იმსჯელეს.

საკრებულოს გადაწყვეტილებას მხარი ფრაქცია „ნაციონალური მოძრაობის“ დეპუტატებმა არ დაუჭირეს: „ეს მასშტაბური ცვლებები არის ცუდი მენეჯმენტის ბრალი. თავიდან სწორად არ აუხსნეს მოსახლეობას აღნიშნული თანხით რის გაკეთებას შეძლებდნენ“, – ამბობს რატი ტატალაშვილი.
მუნიციპალიტეტის საკრებულოში კი განმარტავენ, რომ მოსახლეობის გადაწყვეტილების მიღებაში თვითმმართველობა ვერ ჩაერეოდა და შესაბამისად პრიორიტეტები მოსახლეობამ თავად აირჩია.

„სოფელში ხუთი კაცი შეიძლება ერთ საკითხზე ვერ შეთანხმდეს. ზოგს არ უნდა გზის მოხრეშვა და გადაწყვიტა სასმელი წლის რეაბლიტაციას მოახმაროს თანხა“, – ამბობს ადიგენის მუნციპალიტეტის საკრებულოს თავმჯდომარე იმედა მღებრიშვილი.

მღებრიშვილს ეთანხმება ადიგენის მუნიციპალიტეტის გამგებელი ზაქარია ენდელაძეც: „სოფლის მოსახლეობამ თავად მოისურვა პრიორიტეტების შეცვლა. ჩვენთვის მნიშვნელოვანია მათი აზრი და ჩვენც დავეთანხმეთ მათ“.

შეცვილილი პროექტების განსახორციელებლად ადიგენის მუნიციპალიტეტის გამგეობა სამშენებლო კომპანიებთან ხელშეკრულებებს უახლოეს დღეებში გააფორმებს.

მაგალითად: მოსახლეობის გადაწყვეტილებით სოფელ ქვემო ენთელში სარწყავი არხის მაგივრად, რეაბილიტაცია სასმელ წყალს ჩაუტარდება. სოფელ წახანწყაროში სარწყავი წყლის–საგუბარის რეაბილიტაციის ნაცვლად სოფლის მისავლელი გზა და საცალფეხო ხიდი მოეწყობა. პატარა ზანავში რიტუალების სახლის სარემონტო სამუშაოები აღარ ჩატარდება, აქ მხოლოდ სკამებსა და მაგიდებს შეიძენენ. არზნეში რიტუალების სახლის რეაბილიტაციის მაგივრად სოფელში მისასვლელი გზის რეაბილიტაცია დაიგეგმა. მოხეში სტადიონის მოწყობის ნაცვლად სასმელი წყლის ქსელის მოწყობა გადაწყვიტეს. აფიეთში სასმელი წყლის რეზერვუარი აღარ მოეწყობა და აქ სარწყავი წყლისთვის ორი ლითონის 25–ტონიანი რეზერვუარი დაიდგმება.

ადიგენის მუნიციპალიტეტის საკრებულოში აცხადებენ, რომ „სოფლის მხარდაჭერის პროგრამის“ ფარგლებში განსახორციელებელი პროექტები მიმდინარე წლის სექტემბრამდე უნდა დასრულდეს.

ადიგენის მუნიციპალიტეტში „სოფლის მხარდაჭერის პროგრამის“ ფარგლებში პრიორტეტები გასულ წელებშიც არა ერთხელ შეიცვალა.

[თინათინ ზაზაძე, ადიგენი]