რიტუალები და სასმელი წყალი – ბორჯომში ‘სოფლის მხარდაჭერა’ ახალ ეტაპზე გადადის

ბორჯომის მუნიციპალიტეტში სოფლის მხარდაჭერის პროგრამისთვის 428 866 ლარია გამოყოფილი. ამ თანხით მუნიციპალიტეტის 10 ტერიტორიულ ორგანოში ჯამში 43 პროექტი განხორციელდება.

43 პროექტიდან 8 რიტუალების სახლის რეაბილიტაციას, 7 სასმელ წყალს, 6 გზის რეაბილიტაციას, ხუთი სასაფლაოს და ოთხი გარე განათების სისტემას მომხმარდება.

ასევე, ორ–ორი პროექტია დაგეგმილი სოფლებში საზოგადოებრივი თავშეყრის ადგილის მოსაწყობად, სანიაღვრე არხების რეაბილიტაციისთვის, პარკებისა და სკვერების მოსაწყობად და ხიდის რეაბილიტაციისთვის.

თითო–თითო პროექტი კი სანაგვე კონტეინერების შეძენას, საზოგადოებრივი ტუალეტის მოწყობას, სოფელში არკების რეაბილიტაციას, საკანალიზაციო სისტემას, მოაჯირებსა და ხიდის რეაბილიტაციას შეეხება.

ბორჯომის მუნიციპალიტეტში „სოფლის მხარდაჭერის პროგრამით“ გათვალისწინებული სამუშაოები ჯერ არ დაწყებულა. როგორც გამგეობაში განმარტავენ, ელექტრონული ტენდერი, რომლის შემდეგაც პროექტების განხორციელება დაიწყება, უახლოეს რამდენიმე დღეში გამოცხადდება.

2014 წელს „სოფლის მხარდაჭერის პროგრამის“ ფარგლებში ბორჯომის მუნიციპალიტეტისთვის 430,599 ლარი იყო გამოყოფილი, აღნიშნული თანხა გასულ წელსაც სასმელი წყლისა და გზების რეაბილიტაციას, გარე განათების, რიტუალების სახლის მოწყობასა და სასაფლაოების შემოღობვას მოხმარდა.

რაც შეეხება 2013 წელს,„სოფლის მხარდაჭერის პროგრამის“ ფარგლებში, ბორჯომს 419,901 ლარი ერგო. აღნიშნული თანხით ბორჯომის მუნიციპალიტეტის 11 ტერიტორიულ ორგანოში, 48 პროექტი განხორციელდა.

[თამარ თოთაძე, ბორჯომი]