ასპინძაში ‘სოფლის მხარდაჭერის’ ფული ისევ 'ქელეხებისთვის' დაიხარჯება

ასპინძის მუნიციპალიტეტი ამ პროგრამიდან წელს 277.200 ლარს იღებს. ამ თანხით, 11 ადმინისტრაციულ ორგანოში, 23 სოფელში, 29 პროექტი განხორციელდება. 23 სოფლიდან 6–ში რიტუალების სახლის მშენებლობას, რეაბილიტაციასა და აღჭურვას გეგმავენ. ჯამში რიტუალების სახლებისთვის 7 პროექტი განხორციელდება.

მეორე და მესამე ადგილზე სასმელი წყლის ქსელისა და შიდა გზების რეაბილიტაციაა. ორივე მიმართულებით 5–5– პროექტი განხორციელდება. გარე განათებას დაამონტაჟებენ 3 სოფელში. 2– 2– პროექტი შეეხება სარწყავი არხის რეაბილიტაციასა და ხიდის შეკეთებას.

თითო–თითო პროექტი განხორციელდება სოფლის მთავარი ქუჩის საერთო ღობის მოსაწყობად, სასაფლაოს შემოსაღობად, სასაფლაოზე წყლის მისაყვანად, სანიაღვრე არხის რეაბილიტაციისთვის და სადგომი კონსტრუქციის მოსაწყობად.

ასპინძის მუნიციპალიტეტის გამგეობაში განმარტავენ, რომ „სოფლის მხარდაჭერის პროგრამის“ ფარგლებში განსახორციელებელი პროექტების საპროექტო სამუშაოები უკვე დასრულებულია. საპროექტო სამუშაოებისთვის თანხა 8.106 ლარი, ადგილობრივი ბიუჯეტიდან გამოიყო. სამუშაოები ორ კვირაში დაიწყება. კომპანიებს ტენდერის გარეშე შეარჩევენ.

„ახლა მიმდინარეობს პროექტების გადანაწილება. 5-6 კომპანია უკვე დაინტერესებულია, რომ სამუშაოები დაიწყოს. სავარაუდოდ ყველა პროექტი წლის ბოლომდე დასრულდება“,- ამბობს ასპინძის მუნიციპალიტეტის გამგეობის ინფრასტრუქტურის სამსახურის უფროსი ანზორ ალელიშვილი.

გასულ, 2014 წელს, ისევე როგორც წელს, რიტუალების სახლს 7 პროექტი შეეხო. თუმცა, ამ მაჩვენებლით რიტუალების სახლი შარშან მეორე ადგილზე იყო. 2014 წელს განხორციელებული 34 პროექტიდან, 9 სასმელ წყალს ეხებოდა, 7 რიტუალების სახლს, 6 –შიდა გზებს, 2 –გარე განათებას და თითო სხვადასხვა პროექტებს.

[თინათინ ზაზაძე, ასპინძა]